Tura, May 27, 2025:Tura Doldigre-o rikenggipa Tura Medical College-ko Public-Private Partnership (PPP) mode-o chalaina sorkarini tik ka·aniko Garo Hills-ni dingtang dingtang NGO-rang jekai Garo Students’ Union (GSU), Federation of Khasi-Jaintia & Garo People (FKJGP), Association for Democracy and Empowerment (ADE), A·chik Youth Welfare Organization (AYWO), aro Federation for A·chik Freedom (FAF) dolrang Sombar salo jegalatenba, ia Medical College-ko chalaiani bidingo dingtang dingtang dolrang aro Garo Hills-o songdongenggipa manderang baksa chanchirimchengesa manderangna namgnina sorkarian chalaichina a·dok sorkariko didiataha.

“Tura Medical College-ara manderangni namgnina ma·mong sorkarini on·atgipa tangka paisarangchi rikenggipa Medical College-sa ong·a, uni gimin ia Medical College-ko kuliani miksongara Medical poraigiparangna aro manderangna komia damo sanna bananirangko on·na man·na gita miksonge kulienggipa government medical college ong·a. Ia medical college-ko PPP mode-o private company-chi chalaina on·genchimode, manderangni namgnina miksonganiko pe·ani ba cha·minokani ong·gen” ine NGO-rang parakataha.

Tura Medical College-ko PPP mode-o chalaianio namgijanirangko janapatenba, private company-rangna sorkarini a·ako bilsi 33-na on·chengani ja·man, bilsi 33-na ra·dodaptaina man·ani gimin ia medical college-ko bilsi 66-na private company-chi chalaina on·ani ong·engaha ine NGO-rang parakatenba, ia medical college-ko indita ru·utbea bilsirangna on·ahaode, ia medical college-ko chalaienggipa company-ni kamrang namjagenchimoba bilsi 66 bon·kuja dipetna ra·pilani dongjawaha ineba NGO-rang talataha.

“Expression of Interest (EOI)-ni niamo ia medical college aro hospital-ko private company-ni changa sapanichi chalaina on·engani gimin, ian medical-na ekka poraniko on·anio aro sanna bananirangko on·anioba company-ni sika gita korosrangko ra·na man·aigen aro ian jolni manderangna gimaani ong·gen,” ine NGO-rang parakataha.

Ia Medical college-ni fee-rangkoba college-ko chalaienggipa company-ni sika gitasa tariaignok. Medical College-ni seat-rangkoba 50 percent-onasan management category-ni ning·o kangna man·aigen, uni gimin tribal quota-rangko pe·aniba ong·gen ine NGO-rang janapataha.

Uni gimin Tura Medical College-ko manderangni namgnina sorkarian jako ra·e chalaina nangchongmota ine NGO-rang parakatenba, ia Medical College-ko PPP mode-o chalaina dakkianirangko dontongatchina sorkariko didiataha.

Ia mol·molaniko sorkari knachakjagenchim ong·ode, jingjengatanirangko dakna draatako man·gen, ine NGO-rang mikrakataniko on·ataha.