“Tura College-ko Private Company-chi chalaina on·chongmotjawa” NGO-rang

Tura,June 3,2025:Tura Medical College-ko Public-Private Partnership (PPP) mode-o chalaina sorkarini tik ka·aniko Garo Hills-ni Civil Society Organisation-rang, jekai Tura Senior Citizens, Tura Mothers Union, Garo Students’ Union (GSU), Federation of Khasi-Jaintia & Garo People (FKJGP), Association for Democracy and Empowerment (ADE), A·chik Youth Welfare Organization (AYWO), Federation for A·chik Freedom (FAF), Garoland State Movement Committee (GSMC), A·chik Consciousness Holistically Integrated Krima (ACHIK) aro Post-Graduates Students Union, NEHU Tura Campus dolrang jegalatenba, jedake Shillong Medical College-ko sorkari jako ra·engachim, apsan daken Tura Medical College-koba maming mikkang niteani gri sorkarian jako ra·e chalaichina a·dok sorkariko didiataha.

“Tura Medical College-ko, Garo Hills-o medical education aro sanna bananirangko komia damo ra·na man·na gitasa Doldegre aro Darechikgre A·king Nokmarangni on·gipa bigha 300 a·ao gong kror 189.10 tangkachi rikaha aro ia Medical College-ko PPP mode-o Private Pompany-chi chalaiatanikode chinga raken jegalenga. Tura Medical College-ara 2014 bilsio ANVC aro ANVC-B dolni India aro a·dok sorkari baksa songgigrikanio ku·rachakgimin College-sa ong·a aro ia songgigrikanio sanna banani aro lekka poraniko namdapatna ku·rachakgrikani donga. ANVC aro ANVC dol baksa songgigrikna skangan Medical College aro Hospital-ko sorkarini tangka paisarangchi chalaina aro Garo Hills-ni manderangna dangdike on·na, a·dok aro ma·mong sorkari ra·chakmanaha. Uni gimin, da·o ia Tura Medical College-ko PPP mode-o Private Company-chi chalaianide ia songgigrikaniko pe·ani ong·gen,” ine Garo Hills-ni NGO-rang parakataha.

Tura Medical College-o 50%-oni 55%-ona MBBS seat-rangko Meghalaya-ni chatro chatrirangna a·kanggen, indiba mikkangchi ia songgigrikanirang chu·soka ong·ode, seat chamaniko 60% percent-onaba ra·doatani cholrang donga ine adita salrangna skang Skotong Minister-ni news channel ge·sao agangipani bidingo janapatengon, Directorate of Health Services (Medical Education & Research)-ni on·gipa Expression of Interest (EoI)-ode sorkarini quota-o 50 percent-onasan seat-rangko chamani dongaigen ine talen sea dongskaani gimin ian Skotong Minister-ni agangipa kattarangoni namen dingtanggrikenga ine NGO-rang parakatskaha.

“Badia kattarang kakket ong·a, Gipin a·dokrangko niatgenchimode, an·tangtangni chatro chatrirangna 85% percent seat-rangko chama, indiba maini gimin Tura Medical College-ora 50-60% percent-kosan man·na nanga” ine NGO-rang sing·doataha.

Tura Civil Hospital-de sorkarion dongaigen, indiba College-ni Administration-kosa Private Company-chi chalaina nanggen ine Skotong Minister-ni agangipa kattarangni gimin sing·doatskaengon, “Ia College-o poraienggipa chatro chatrirangara badia Hospital-osa skie ra·skagen?.. Skie on·gipa Hospital-ko sawa chalaigen?” ine NGO-rang sing·doatenba, National Medical Commission (NMC)-on Medical College-rango skie on·gipa Hospital dongchapna nangchongmota, ine janapani donga ine Skotong Minister-na gisik ra·atpilaniko on·atskaaha.

Tura Medical College-ko PPP mode-o chalaianichi namgijanirangko janapatengon, ia niamo Private Company-rangna sorkarini a·ako bilsi 33-na on·chengani ja·man, bilsi 33-na ra·dodaptaina man·ani gimin ia Medical College-ko bilsi 66-na Private Company-chi chalaina on·ani ong·engaha ine NGO-rang parakatenba, ia Medical College-ko indita ru·utbea bilsirangna on·ahaode, ia Medical College-ko chalaienggipa company-ni kamrang namjagenchimoba, bilsi 66 bon·kujaskalde ra·pilani katta dongjawaha ine NGO-rang parakataha.

“Uni gimin jatni namgnina A·chikrangni on·gilgipa a·arangko jakkalsretjachina aro Tura Medical College-ko PPP mode-o chalaina tik ka·aniko del·galpilchina chinga sorkariko mol·molenga. Shillong Medical College-ko Private Company-chi chalaina on·jaenga ong·ode, maini gimin Tura Medical College-ko Private Company-chi chalaina on·skaenga? Iako chinga maming dakeba ra·chakna man·chongmotjawa,” ine Garo Hills-ni NGO-rang parakataha.