Tura, Oct 21,2024:Tura-ni MDC aro BJP-ni State Vice President Bernard N.Marak, Meghalaya a·dokni Schedule Tribe (ST) chatro chatrirangni Scholarship-na dorgastoko galanio Autonomous District Council (ADC)-ni pal a·dok sorkarini on·gipa Income Certificate aro Affidabit-rangkosa ra·chakengani a·sel neng·nikaniko man·tokengani gimin, ST chatro chatrirangna niamko dingtangatchina Union Tribal Minister Jual Oram-na chitti sedoataha.

Meghalaya a·doko Scholarship-na dorgasto galenggipa nang·bata chatro chatrirangan, kangal cholgri nokdangrangonisa ong·ani gimin, a·dok sorkarini on·enggipa Income Certificate aro Affidavit-rangko tarianio bang·en koros ong·engani a·sel, neng·nikaniko chagrongtokenga ine parakataha.

Chatro chatrirang re·anggipa bilsionin Scholarship-rangko man·tokkujaenga aro chatro chatrirangni nangnikaniko official-rang knachakjaenga ine Marak badi ka·doataha.

Uni gimin ST chatro chatrirangni neng·nikanirangko ma·sichake nirokatpachina Marak Union Tribal Minister-ko mol·molataha. Scholarship-na dorgasto galenggipa ST chatro chatrirangna MDC ba ADC-rangni on·enggipa income certificate, affidavit aro gipin nangchongmotgipa lekkarangko ra·chakenba ta·rake aganchakaniko on·china Tura-ni MDC, Union Tribal Minister-ko didiataha.

A·dokde ST-rangni kosako bil man·gipa ong·jani gimin, chatro chatrirangna ADC-rangni man·gipa bilko ra·e katna nangja ine janapatenba, ST chatro chatrirangni namgnina ia kamko ta·raken niatchina Bernard Marak, Union Minister-ko didiataha.

Una agreba scholarship-na dorgasto galani bon·kamgipa tarikko dingtangmancha ST chatro chatrirangna ra·dodapatchina gitaba BJP dilgipa Union Minister-ko mol·molataha.