Tura, April 2, 2025: Garo Hills-o dingtang dingtang NGO-rang, Civil Society Organisation-rang, Tura-ko Winter ba Sin·karini Tom·bimongani ba Tura-ko Meghalaya-ni Gnigipa Skotong ba Second Capital dake songchina dabianio, Meghalaya a·dokni Bharatiya Janata Party (BJP) dolba chakpaaniko on·ataha. Manderangni jakchi seokako man·gipa Garo Hills-ni pilak dilgiparangkon apsan ku·monge, Winter Capital-na dabianio bakrimaniko on·pachina didiataha.

“Tura-ko Winter Capital songchina dabianiko chinga BJP dolba nangnikpaengani gimin, chinga iani bidingo apsan bakrimenggipa dolrang baksa chanchirimgen. Iako chinga Assembly election-oba chingni mingsa miksongani gita ra·aha, indide chingni chanchianiko da·o maina watgalgen. Ian skangoni ku·rachakgimin kam ong·a aro chinga iano pangchake manderang baksa ku·cholsan ong·e dabianggen. Ia dabianiko ia changon be·en pil·atna gita chinga krenge kamko ka·anggen” ine BJP-ni State Vice President aro Tura-ni MDC Bernard Rimpu N. Marak parakataha.

Tura MDC-ni parakatani gitade, adita salrangna skang, Assembly-ni Budget Session-o, Opposition dolni dilgipa Dr. Mukul Sangma, Winter Capital-ni bidingo chanchirimna resolution-ko ra·baaha, indiba Opposition doloni ra·bagipa Motion ong·ani gimin Garo Hills-ni bang·a dilgiparangan iani bidingo chakpaaniko on·na jechaktokaha.

Apsan daken, Garo Hills Autonomous District Council (GHADC)-ni Provisional Budget Session-oba Opposition dolni MDC-rang Winter Capital-ni gimin chanchirimna resolution-ko ra·baha, indiba GHADC-ni ruling MDC-rang chanchirimna jachaktokaha. Tura-ko Winter Capital songchina dabiani resolution-ko ra·na gita ruling MDC-rang bakrimaniko ra·pilahani giminsa Opposition MDC-rang, Session-oni ong·kate kataha ine Tura-ni MDC parakataha.

Marak-ni parakatani gitade, Tura-ko Winter Capital songchina dabianiko nipilna Committee ge·sako songna a·dok sorkari ku·rachakahani gimin, GHADC-ni ruling MDC-rangba uakon pa·siktokaha.

“Tura-ko Winter Capital songani bidingo a·dok sorkarini kam ka·aniara manderangni ka·dongani gitade, namen dingtanggrika. Meghalaya A·dokko man·chengaonin, Garo Hills-ni manderang, Tura-ko Winter Capital songaniko nichake dongengachim, indiba da·alona kingkingba Winter Capital-ko songe on·kujaengani gimin, seokako man·gipa Garo Hills-ni dilgiparang, an·tangtangni daitoko ma·sina nanga” ine BJP-ni State Vice President parakataha.

Tura-ko Winter Capital songchina dabianiko re·anggipa Assembly Budget Session-o a·dok sorkari nipilaniko dakna ku·rachakaha aro Winter Capital-ni bidingo kamrangko nipilna dingtangmancha Committee ge·sako songna a·dokni Skotong Minister Conrad K Sangma ku·rachakangaha.