Shillong, Mar 7, 2025: Garo Hills-oba Khasi Hills a·jao gita apsan namroro silroroaniko ra·bana man·na gita Tura-ko Winter Capital songchina dingtang dingtang NGO dolrang dabitokengon, ia dabianiko nipilna gita a·dok sorkari, dingtangmancha Committee-ko songna tik ka·angaha.

Tura-ko Winter Capital songchina dabiengani bidingo Opposition dolni dilgipa Dr Mukul Sangma, Bristibar salo chanchirimaniko Assembly-o a·bachengataha aro ia chanchirimanio Assembly-ni Deputy Speaker Timothy D Shira, Jim M Sangma, Celestine Lyngdoh, Renikton Lyngdoh, Rupa M.Marak, Brening A.Sangma, Limison D.Sangma aro Subir M.Marak aro Assembly-ni gipin member-rangba bak ra·angtokaha.

Tura-ko Winter Capital songchina dabiengani bidingo nipilna gita Committee-ko songna ku·rachakani ja·man Dr. Mukul Sangma-ni ra·bagipa Resolution-ko ra·pilahaoba, a·dokni Skotong Minister Conrad K Sangma-ba mittele aganangaha.

Assembly-o chanchirimengon, Rangsakona-ni MLA, Committee-ko songna ku·pattianiko on·angaha aro iani bidingo jera ra·grikani ja·man, Tura-ko Winter Capital songchina dabiengani bidingo nipilna nangnikaniko bang·bata member-rangan namnike ra·chaktokaha, ine Skotong Minister, Assembly-o parakataha.

Tura-ko Winter Capital songani bidingo chanchirimna committee-ko songanio Political dolrang, Civil Society-ni member-rang aro jatko dilgiparang bak ong·gen ineba Skotong Minister parakataha.

Winter Capital-ko songani bidingo talataniko on·angengon, adita sal somoirangna Minister-rang aro Chief Secretary-ko man·chape sorkarini Executive Wing-ko Tura-ona ra·angen aro Assembly Session-rangko ong·atani ong·gen ine Skotong Minister parakataha.

Tura-o Winter Capital-ko songanio adita korosrang ong·gen, indiba pilak biaprangon apsan namroro silroroaniko on·ani aro sorkariko chalaianio apsan man·gopanisa mongsongbatgipa bak ong·a ine Skotong Minister parakataha.

Iako korosmangmangni gitasan niatna nangjawa, indiba pilakkon bak ong·ate, sorkarini kamrangko manderangona sokatani aro pilak biaprangkon tang·doatanikosa nina nangenga,ine Sangma aganaha.

Tura-o rikenggipa gong kror 170-ni Integrated Administrative Complex-an sorkarini kamrangko manderangona sepangbatatani bak ong·gen ineba Skotong Minister parakataha.