Tura, Sept 4,2024: Re·anggipa 2023 bilsio Talent Hunt program-ko Tura-o ong·atanio, tol·e fund ba tangka on·ani chittiko on·e cha·bokaha, ine Garo Hills Talent Development Society (GHTDS), Meghalaya Tourism-ni Directorate-ko matnangataha.

“Ia program-ko ong·atna gita chingna adita tangka paisarangko chamaha ine 2023 bilsini September jao, Shillong-o donggipa Directorate Office-oni chittiko seatahani gimin chinga changgnina kingking Tura-oni Shillong-ona re·ange sing·sandianirangko dakaha, Indiba, chinga maming tangka paisa chamanirangko man·jaha. Uni ja·mano Director-ni chingna seatgipa chittiko mesokchina, Shillong Tourism Office-o kam ka·enggipa saksa chingko aganaha aro Tura-ni District Tourism Office-onikoba sing·sandichina aganataha. Indiba Tura office-o kam ka·enggipa mande, Shillong Directorate Office-oni maming u·iata dongja, ine chingna aganatskaaha” ine GHTDS-ni member-rang suk ong·gijaniko parakataha.

“Uandake, re·anggipa 2023 bilsion, chang 12-gipa Talent Hunt-ko ong·atna chingko dorgasto galtaichina u·iataha. Tangka paisarangko chamaha ine Director-ni seatgipa chittiko chinga September jao man·soahaoba, December jaona kingkingan maming kamrangko ka·chipjaha. Iani a·sel chingni tangka paisarang aro somoirang indin bon·aiaha” ineba GHTDS-ni member-rang parakataha.

Indake, Cha·bokahani gimin kamtangtangko name ka·gijagipa Officer-rangni kosako sandianiko dakenba nanga gita ja·kurangko de·china GHTDS, bil gnanggipa official-rang, minister-rang aro warachakenggipa dolni dilgiparangko mol·molataha.

“Tangka paisa dakchakanirangko on·china chinga bilsiantian Tourism Department-o dorgastorangko galronga, indiba da·alona kingkingba chinga drae tangka paisarangko dabia dongja aro Department-ni kosako badi ka·anirangko dakkuja. Indiba iandake cha·bokaniara namen ra·chakna man·gijani ong·a” ine GHTDS parakataha.