Baghmara, Mar 11, 2025: South Garo Hills a·jao Job Card-ni kamrngko ka·enggipa manderang, an·tangtangni man·gni hajirarangko man·tokkujaengani gimin, South Garo Hills a·jani Social Activist Greneth M Sangma, manderangni man·kugijagipa Job Card-ni hajirarangko ta·rake on·china, South Garo Hills a·jani Deputy Commissioner-na March 10 tarik Sombar salo sedoataha.

South Garo Hills a·jani Baghmara, Chokpot, Gasuapara aro Rongara-Siju Block-rango Aadhar Card donggijagipa manderangna gital Work Order-rangko tarie on·china Greneth Sangma didiataha.

Kosako janapatgipa Block-rango Mahatma Gandhi National Rural Employment Guarantee Act (MGNREGA)-ni kamrangko ka·e cha·enggipa manderang, Aadhar Card-rang dongjani a·sel kamrangko ka·pana cholrangko man·tokjaenga, indiba Sixth Schedule a·jarangkode Aadhar-oniko watani gimin ua manderangba, Aadhar Card gri kamrangko ka·e cha·na cholko on·piltaina nanga.

Songadam nokadamrango songdongenggipa manderang Job Card-ni namgnirangko man·na gita Aadhar-ko nangchongmota ong·ja, ine Supreme Court-an raiko on·manahani gimin, South Garo Hills a·jani manderangba Job Card-ni kamrangko ka·e cha·na cholrangko man·pana nanga, ine Social Activist, South Garo Hills a·jani Deputy Commissioner-na sedoatgipa chittio janapataha.

Re·anggipa 2022-2023 aro 2023-2024 bilsirangonin South Garo Hills a·jao Job Card-ni kamrangko ka·gipa manderang an·tangtangni man·na nangenggipa hajirarangko man·tokkujaengani gimin uamangni man·na nangkugijagipa hajirarangko ta·rake on·china Greneth Sangma didiataha.