Shillong, June 2,2025: Meghalaya a·dokona songrebagipa, Madhya Pradesh a·dokni Indore songjinmani tourist sakgni Sohra jolo gimaenggipa da·al June 2 tariko sal 10 gapengahaoba, uamang sakgniko da·alonan man·pilkujaenga.

Indore songjinmani bia ka·daldale re·bagipa jiksesa, Sonam Raghuwanshi aro Raja Raghuwanshi, re·anggipa May 22 tariko, Mawlakhait songona sokbae, a·gital manderangko biap nidilgipa Bah Wansai baksa Nongriat-o donggipa ‘Double Decker Root Bridge’-ko nina re·angahachim. Uamang Nongriat-o, Shipara Homestay-o waltue, May 23 tariko Mawlakhait-ona re·angpilna gita Shipara Homestay-oni re·ongkatangaha, indiba ua somoionin uamang jiksesa re·piltaijaha.

Indake, May 24 tariko, uamangni para ra·e re·anggipa scooty-ko Sohrarim-oniko man·aha aro uni ja·mansa, uamangni gimaako pulisna badi ka·aha.

Una skang, May-ni 22 tariko uamang, Saitsohpen Sohra-o donggipa, Manha Homestay-oba napangahachim, indiba ua homestay-o biap dongjani gimin, mikkarang jimbee waengani a·sel an·tangtangni bosturang baksa uamangni biming aro phone nomber-ko on·e, uamang gipin biapko sandiangaha aro ja·mano uamang Nongriat-ona re·angaha ine official-rang parakataha.

Indake ong·engon, uamang jiksesako sandina gita a·dok sorkari, Pulis aro SDRF dolrang baksana songni manderangkoba sak 50-mang, dingtang dingtang biaprango jakkalenga aro je biaprangona manderang re·angna neng·beani ong·achim, uandakgipa biaprangoniko sandina gita K9 sniffer dog-rang baksa drone-rangkoba jakkalenga ine official-rang parakataha.

Gimaenggipa tourist-rangko sandina gita pulisrang aro songni manderang walang salang rakbee kamrangko ka·enga, ine a·dokni Skotong Minister Conrad K Sangma-ba parakataha.

“District Administration, SP aro pulisrang, gimaenggipa jiksesako salo konta 24-na sandienga. Uamangko sandianio sorkarini manderangsan ong·aigija, indiba dingtang dingtang songni manderangba ua jiksesako sandina dakchakpaenga,” ine Skotong Minister parakataha.

“Ia manderangko sandianio chinga, pilak donga technology-rangko jakkalenga, indiba ian wachini somoi ong·ani gimin, kamko ka·anio neng·nikanirangko chagrongna nangenga. Indiba chinga ia sakgniko ta·raken man·pilna jotton ka·enga,” ineba ua aganaha.