Tura, Oct 4,2024: A·dokni Skotong Minister Conrad K.Sangma Budbar salo, GREEN (Grassroot Level Response Towards Ecosystem Enhancement & Nurturing) Meghalaya Plus scheme-ko Tura District Auditorium-o a·bachengate on·angaha.
Ia scheme-ko a·bachengatanio, a·dokni Education Minister Rakkam A Sangma aro dingtang dingtang dilgiparang bak ra·angtokaha. Ia GREEN Meghalaya plus scheme-ko Tura-o a·bachengate on·anio a·dokni Skotong Minister, jinmana aganprakengon, buring bolgrimrangko ripingna gita sorkarini a·bachengatgipa scheme-ko jako ra·e kam ka·enggipa songrangko mittelpilangaha.
Batanggimin bilsio a·dok sorkari, manderangna namgniko ra·bana gita dingtang dingtang program-rangko a·bachengataha aro iandakgipa program-rangchi a·dokni dal·roroani aro namroro silroroaniko ta·rakbatataha ine Sangma aganangaha.
A·dokni dal·roroanina sorkari, dingtang dingtang cholrangoniko tangka paisarangko ra·e jakkalenga aro da·alo a·dokni economy-o dingtanganiko nikna man·engaha, ine Sangma aganaha.
Meghalaya a·doko buring bolgrimrangko tangatpilna kam ka·na gita a·dok sorkari, GREEN Meghalaya (PES) scheme-ko mongsonggipa ong·e jako ra·aha. Batanggimin bilsignini gisepo a·dok sorkari, buring bolgrimrangko ripinganio gong crore 44-na baten koros ka·aha aro mikkangchiba buring bolgrimrangko ripingna gita gong crore 200-na baten chame donaha ine Skotong Minister parakangaha.
Ia tom·anio a·dokni Education Minister Rakkam A Sangma-ba dongpae jinmana aganprakengon, ia Green Meghalaya scheme-ara buring bolgrimrangko chel·chakna aro ripingna gita manderangko didina dakchakani ong·a ine aganangaha.
Garo Hills-o donggipa buring bolgrimrangko ripingna gita sorkarini tangka paisarangko on·aniara manderangnan namgni ong·gen, ine Rakkam aganaha.
Ia GREEN Meghalaya plus scheme-ara a·dok sorkarini ra·gatgipa Payment for Eco System Services (PES) ong·a aro buring bolgrimrangko ripingna gita ia scheme-ni ning·o dingtang dingtang songni manderangna hectare-prako gong 20,000-ko bilsiprako on·gen. PES-ni skanggipa bakode ia scheme-ko jako ra·e buring bolgrimrangko chel·chakna gita komibeoba hectare 2-ko nangachim, indiba ia gital scheme-ni niamode hectare 1 buring bolgrimkosan nangaiani gimin bang·gija a·a dongpagipa manderang aro songrangba ia scheme-ko ra·e buring bolgrimrangko ripingna man·gnok.
Ia program-ko ong·atanio, CM Elevate, Focus aro Payment for Ecosystem Services (PES)-ni cheque-rangko suale on·angjolaha.
