Ampati, May 7,2025: Meghalaya-ni BSF sipairang sima ari gita niam gri napsrukna jotton ka·enggipa sak 4 Bangladesh-ni manderangko rim·aha.

May 6 tarik Monggolbar walo Meghalaya Frontier-ni ning·o donggipa BSF Troop-rang sriksrik kobor man·soe, niam gri napsrukbaenggipa Bangladesh-ni manderangko sima ari gita batsoram ramao timsoe rim·aha.

Rim·a man·gipa manderangara Mymensingh, Gajipur aro Nogaon district, Bangladesh-oni ong·achim. Ua mandeangko BSF sipairang niam gita sing·sandianiko dakchina, South West Garo Hills a·jani Mahendraganj Pulis Station-ona pakwatataha.

Meghalaya-ni BSF sipairang chubata gadangoni ge·etaniko man·e, a·songko chel·chakna ku·rachakgimin gita, Indo-Bangladesh sima ario nirok sandianiko dakenba, niam gri sima ari gita napsrukgiparang aro niam gri badingsrukanirangko champengna namedake am·sandianiko dakenga, ine BSF official parakataha.