Tura, Oct 7, 2024: Batanggipa salrango dondikgija mikkarang waanichi a·arang be·dapanichi aro chirang bananichi Garo Hills gimiko sak 15 manderang siangahani gimin, sianggipa manderangni nokdangrangna ex-gratia ba tangka paisarangko on·skachina, a·dokni Skotong Minister Pa Conrad K.Sangma, Garo Hills-ni District Administration-rangna ge·etaniko on·ataha.

Re·anggipa Bristibar salonin dontonggija mikkarang jimbee waani a·sel Garo Hills gimikon, a·a be·anirang aro chi bananirang ong·aha. Indake a·sel ong·anirango sak 15 manderang rasong gribee an·tangtangni gamchatgipa janggirangko gimaatna nangaha.

Garo Hills-o indakgipa a·selrang ong·anichi bang·a manderang neng·nikanirangko chagrongna nangahani gimin, a·dokni Skotong Minister, Garo Hills-ni dingtang dingtang District Administration-rang baksa Video Conference ka·e, chanchirimaniko dakenba, a·sel ong·anio sianggipa manderangni nokdangrangna dakchakaniko on·na gita ex-gratia ba tangka paisarangko on·china aro a·sel ong·anichi neng·nikaniko man·enggipa manderangna, pilak nanganirangko on·china gitaba ge·etaniko on·ataha.

Unbaksana, West Garo Hills aro South Garo Hills a·jani gisepo rama jal·langrang nosto ong·atako man·e, ramarang champengataniko man·engani gimin, a·ja damgnini gisepo re·ruraenggipa manderangna rama jal·langrangko tarie on·china Pa Sangma ge·etaniko on·ataha.

Re·anggipa Sukrobar pringo, South Garo Hills a·jaona dakanggipa border ramao donggipa Dalu Chaipani jolni dollong ge·sako chi pe·angaha aro ua rama gita re·ruraani maming chol dongjaha.

Ua dollongko ta·raken taripiltaichina ge·etaniko on·atenba, a·doko donggipa pilak bolni dollongrangko sandimanaha aro ua dollongrangni pal Bailey Bridge-rangko rike on·skagen ine Skotong Minister ku·rachakataha.

Da·o mikkarang namsrangkujaengani gimin, pilak a·jani officer-rangkon mikkrake dongchina aro nangani kri ta·rake kamrangko ka·china gitaba Skotong Minister ge·etangaha.