Williamnagar, May 13: East Garo Hills a·jani Samanda Parish-ni Robibar salo, Spring Gospel Concert-ko St. George Samanda Parish Youth Convention-o ong·atanggipa Concert ba ring·salrao, Tura-ni Fidem, Resubelpara-ni DSP aro gipin git ring·giparangba bak ra·e, manderangko an·saoatangaha.

Mikkarang wagenchimoba, Concert-o ring·salrako ong·atna skang mikkarang name on·ahani gimin Robibar attamo ring·salrako nambee aro tom·e matchotatna man·aha.

Indake, ring·salrako a·bachengna skang, Samanda Parish-ni Fr. Jimberth K Marak, rimchaksoani kattarangko aganangengon, program-ko ong·atna gita tangka paisarangko on·e dakchakahani gimin Songsak-ni MLA Dr. Mukul M.Sangma-ko de·mittele aganangaha.

Youth Convention ba chadamberangni tom·bimonganio sak 150-na baten chadamberang bak ra·angtokaha. Ia tom·bimonganio chadamberang Kristo-ko ra·chakan baksa Samanda Parish-o Nokgipa Isolna dangdike on·na gita an·tangtangko on·kangtokaha ine Fr aganangaha.

Ua tom·bimonganio, Songsak-ni MLA Dr. Mukul Sangma-ba dongpae jinmana aganprakangengon, chadamberangni tom·bimonganio ia concert-ko ong·atna rakbee kamrangko ka·dilgipa Fr.Jimberth K Marak-ko mittelpilangenba, ia ring·salrako ong·atanichi manderang gisikni gita pattianiko man·tokaha ine aganaha.

Ia salara Mothers Day ba ma·giparangni salba ong·ani gimin ia program-ko ong·atanio ua dingtangmancha ma·giparangna an·tangni nama skaniko on·angjolaha.

Ua ring·salrako ong·atanio Dr. Sangma-ba ‘Mairongpile Dal·a Na·a’ ingipa gitko ring·e, Isolna rasongko on·angenba manderangko an·saoatangaha.

Ua ring·salrao, Fr. Jimberth K Marak aro uni dolba, gitrangko ring·e manderangko an·saoatangaha.

Ua tom·bimonganio dongpae bak ra·giparangara, Williamnagar-ni MDC Alphonsus R Marak, Rongrong-ni MDC Rinaldo K Sangma, Kharkutta-ni MDC Cherak W Momin, Damas-ni MDC Ferdinand D Shira aro gipinrangba dongpaaha.