GHD News, Tura Oct 22, 2025: West Garo Hills a·jani Dalu Chaipani-o donggipa cha dokkan ge·sao mitchi mitchi sera bera cha·anirangko tarie palenggipa cha dokkan nokgipani kosako Brilliant Ch Momin, October 21 tarik Monggolbar salo Dalu Pulis Station-o badi (FIR) ka·dongaha.

Brilliant Momin-ni u·iatani gitade, uni cha dokkanona re·ange nianion, ua cha dokkan-ni babilsio tampirang namen bang·a aro ua bilbilaiara balwa jokna gita kelkirang dongja aro sal nanggijagipa babilsi ong·achim. Cha·anirangko gripgija bangbang donani gimin a·dimurang aro jo·ongrang ga·akdapenga. Ua dokkano sera bera mitchi mitchi cha·anirangko tarie manderangna palengachim. Ua dokkano sera bera paratha aro misti-rangko tarienga, uarangko nikode, manderang darangba bree cha·jawa. Ua dokkano salgni mangna bangbang gripgija dongipa gitcham singera sauce-ko taritaitaie manderangna on·enga.

Ia obosta, October 21 tarik pringni 8 bajimango, “Anga paratha tarina order ka·aha. Angni order ka·gipa ru·utani gimin, anga cha·ani tarigipa babilsiona re·ange nion, babilsio rongtalgija sera bera mitchi mitchi cha·ani tariako nike jagokpilaha. Iandake mitchi mitchi tarigipa cha·aniko bree cha·genchimode, manderangni an·seng baljokanina namen kenbeani ong·a aro food safety-ni niamko pe·ani ong·a” ine Momin parakataha.

Indake rongtalgija sera bera mitchi mitchi cha·ani tariako nike, “Anga sakkina video ka·aha aro indakgipa obostako manderangba nikchina aro ma·sie ra·china video ka·e mesokatenga aro iani bidingo sandianiko nangnikenga” ine Momin janapataha.

Uni gimin, “Manderangni an·seng baljokanina aro indakgipa obostarangoni manderangko naljokatna, food safety-ni niam gita ia cha dokkan nokgipani kosako ta·rake ja·kurangko de·china” Momin mol·molataha.