Ampati, June 3,2025: South West Garo Hills a·jao Meghalaya Pulisni kamna, re·anggipa June 1 tarik Robibar salo porikka ra·angahani gimin, AHAM South Western Zone, Ampati, raken jegalataha.

Ian skanggipa Kristianrangni biapo Robibar salko tik ka·e, porikka ra·ani ong·enga. Robibar salara Kristian bebe ra·gipa sakantina Rongtalgipa aro mongsonggipa Olakkiani aro neng·takani sal ong·a, ine AHAM South Western Zone, suk ong·gijaniko parakataha.

Meghalaya a·dokara Kristianrangni dongram ba biap ong·a aro Kristian-rang Robibar salo Gilja ka·e, Isol-ko Olakkia. Uni gimin a·dok sorkarini Robibar salo kamna porikka ra·aniara ra·chakna man·gijani aro Kristianrangko chonnikani gita ong·enga, ine AHAM South Western Zone, parakataha.

Robibar salara Kristianrangna dingtangmanchagipa sal ong·a. Indiba a·doko sorkariko chalaigiparangde, Robibar salosa chong·motan Olakkiani aro neng·takani salosa sorkaini kamrangna porikkarangko ra·skaenga. Iandake, Robibar salo kamna porikkarangko seatianira, porikka sena sienggipa candidate-rangna aro uamangni nokdangna gisiko nangchakeani ong·a. Indoba, Sonibar salo porikkarangko seatode, pilakni gitan maming neng·nikani dongjawachim, ine AHAM South Western Zone-ni President Wester G.Sangma parakataha.

Indake ong·engon, mikkangchi a·dok sorkari aro bil gnanggipa official-rang, dingtang dingtang kamrangna porikka ra·aniko, Robibar salo ong·atgija, Sonibar salo ong·atskachina, AHAM South Western Zone, didiataha.