Pakistan-ni ISI-na sriksrik kobor on·timgipa me·chik youtuber baksa gipin sak 6 manderangko pulisrang rim·a
New Delhi, May 18, 2025: India Armed Forces-rangni, “Operation Sindoor”-ko a·bachengata intal, Pakistan-ni ISI bobil dolna sriksrik nirikkie kobor on·timgipa me·chik youtuber baksa gipin sak 6 manderangko Haryana Pulis, Sonibar salo rim·aha, ine official saksa parakataha.
Rim·a man·gipa manderang gimikan, ISI baksa jak donge, bobil dolna pilak kobor-rangko sriksrik u·iattimgipa manderang ong·a ine pulis aganaha.
ISI bobil dolna sriksrik kobor on·timgiparang, saksa Kaithal-oni, saksa Panipat-oni, saksa Nuh-oni aro me·chik youtuber Jyoti Malhotra-ko Hisar-oniko rim·aha. Uko (Jyoti) Katchariona rim·angani ja·man, salbonga Pulis remand-na watataha.
Youtuber Jyoti Malhotra sak 377K subscriber-rang aro sak 132K follower-rang Instagram-o ong·ahachim. Ua ia bilsini March jao an·tangni Pakistan-chi songreangako video ka·e post ka·aha.
Haryana Pulisni u·iatani gitade, Jyoti Malhotra Pakistan-ona changgittam re·angaha aro pulisrang uni passport-ko ra·sekaha ineba parakataha.
Uni pagipa, Harish Malhotra, indake aganaha, “Jyoti pilak nanga permission-rang aro valid VISA-ko ra·e, uarango pangchake Pakistan re·angaha”.
“Anga da·alo Jyoti-na aganaha, unon ua baba anga namenga aro angko namgijao ja·guataha” ine ua aganaha.
Gipin sakgni rim·a man·gipa manderangba, unbaksa apsan kam ka·giparang ong·na nanga ine pulisrang chanchichipenga. Pulisrang uamango kakket a·selko ma·sina gita namedake sing·sandianiko dakenga.
Bilsi 25 ong·gipa saksa Devendra Singh, PG Diploma-na poraienggipa chatro ong·achim.
“Chingni staff Cyber Pulis Station-o namedake am·sandianiko dakenga aro uni jakoniko device-rangko man·aha. Maibakaie kakketko man·a ong·ode, niamko ja·rike jekoba kam ka·na nanggen,” ine official saksa aganaha.
Report-ni gitade, Singh-ara Punjab College-ni chatro ong·achim. Ua re·anggipa bilsini November jao Pakistan-o donggipa Nankana Sahib Gurdwara, minggipa rongtalgipa biapko nina re·ange ia kamko a·bachengaha, ua Pakistani Intelligence Operatives baksa agangrike ong·gija kamna miksongesa re·angaha. Uni India-ona re·bapilaonin, ua uamang baksa jak dongaha, ine official-rang aganaha.
Unbaksana, Punjab-o rim·a man·gipa gipin sakgni manderangara, Indian Military-rangni donugipa kattarangko sriksrik ISI-na parake on·giparang ong·achim. Uamanga, Palak Sher Masih aro Suraj Masih ong·achim.