Guwahati, May 5, 2025: Re·anggipa April 22 tariko Pakistan a·songni bobil dolrang Jammu and Kashmir a·dokni Pahalgam tourist biapo roenggipa manderangko chadrape so·otani ja·man, Assam a·doko Pakistan-na chakgipa sak 42 manderangko Assam pulisrang dingtang dingtang a·jarangoniko rim·aha, ine Robibar attamo Assam-ni Skotong Minister Henta Biswa Sarma update ka·ataha.
Assam-ni Skotong Minister Sarma-ni X-o post ka·ani gitade, Barpeta, Hojai aro Chirang a·jarangoniko sakgittam manderangko Robibar salo rim·dapaha aro rim·a man·gipa manderang chu·gimik sak 42 gapaha.
“India a·songo songdonge, Pakistan a·songo pangchake dakchakanilo on·enggipa manderang, a·songtangko gimaatna jotton ka·enggipa manderangko am·sandie rim·a, gimik sak 42 gapaha, uamang a·songtangni manderang ong·ja, a·songtangni kosako re·giparangsa ong·a, uni gimin uamangko adalotni janggilo chadengate dongen” ine Skotong Minister seataha.
Gipin a·dokrango uandakgipa manderangko sandie rim·enga gitan, Assam pulisrangba Pakistan-na chakgiparangko sandie rim·na a·bachengataha. Indaken, bil gnanggipa authority-rang ong·gija kamrangko ka·e dos dakgiparangko dontonggijan am·sandianiko dakengkua ineba parakataha.
