Resubelpara, May 17, 2025: Re·anggipa April 22 tariko Jammu aro Kashmir a·dokni Pahalgam-o Pakistan-ni bobil dolrang skatang chadrape, sak 26 manderangko so·ote galani gimin, India a·songba ua bobil dolrangko a·jak sokskana nisan done dingtangmancha, “Operation Sindoor” ine bimingko done, Indian sipairang Pakistan aro Pakistan Occupied Kashmir-o bobil dolrangni dongchakenggipa dam 9 biaprangko chadrape nosto ka·skaha. Uni ja·mano, May 6 tarikoni 10 tarikona, India aro Pakistan dakgrikani somoio, a·songtang India-ko chonnike, Pakistan a·songna chakgipa A·chikrang sakgniko Sonibar salo North Garo Hills a·jani Pulisrang rim·aha.
Rim·a man·gipa manderangara, North Garo Hills a·jani Bajengdoba Pulis Station-ni ning·o donggipa Chorebolbok songni Silgring D Sangma aro Bajengdoba Chambildam songni Asbath B Marak ong·achim.
Ua sakgni manderang Social Media, Facebook aro Whatsapp group-o Pakistan a·songna chakenba, Pakistan Zindabad ine A·chik ku·chi chrike, Social Media-rango gipatahachim.
Uamangni Pakistan-na chake agangipa kattako Social Media, facebook-o video-ko niksoani ja·man, ua sakgni manderangni kosako North Garo District Administration, May 15 tariko mokkordoma ka·aha. Indake uamang sakgniko Pulisrang rim·aha.
