New Delhi, May 8, 2025: Batanggipa April jao Jammu aro Kashmir a·dokni Pahalgam tourist biapo, Pakistan a·songni bobil dake chakatgipa manderangni goe galako man·gipa manderangko, mande ra·pilskaani chin gita, ‘Operation Sindoor’ ine Indian Army-ni chadrapaniko biming donaha.

Re·anggipa April-ni 22 tariko, Jammu aro Kashmir a·dokni Pahalgam-o bobil dolrang, sak 26 manderangko skatang so·ote galahani gimin, Budbar pringwalonin India a·songba, Pakistan aro Pakistan Occupied Kashmir (PoK)-o bobil dake chakatgipa dolrangni dongchakenggipa biaprangko bomarang goe chadrapskana a·bachengaha.

Official-rangni u·iatani gitade, Pahalgam-o so·ota man·gipa manderangko jik dedrangni mikkango so·ote galahani gimin, me·chikrangni mikkingo nonggipa ‘Sindoor’-ko kimitgalaha ine bobil dolrang, India a·songni Prime Minister Narendra Modi-na aganchina watataha.

India a•songo Hindu me•chikrangni ia ‘sindoor’ ba mikkingo totaniara, bia ka•gimin me•chik ine mesokani chin ong•a aro ia ‘sindoor’-ko kimitgalaniara, uni randi ong•aniko mesokani chin ong•skaa.

Segiparangko so·ote, India a·songni me·chikrangko randi ong·atani gimin, me·chikrangko mande ra·na aro bobilrangko a·jak sokskana, India a·songni Prime Minister an·tangan ‘Operation Sindoor’ ine biming mingaha.

Indian Army-rang Modi-ni aganako ra·chakaha aro bobil dolrangko so·ote galna re·chakataha.

Ia ‘Operation Sindoor’-ara bobil dolrangko bon·atanisan ong·aija, India a·songo songdongenggipa manderangni kosako saknaatani aro duk mikchi ong·ataniko a·jak sokgijade watjawa ingipa miksongani ong·a, ine official saksa aganaha.