NPP-ni dilgiparang GHADC-na on·atgipa tangkarangko party-tangni namgninasa jakkalsretenga:Bernard
Tura, Sept 12,2024: Meghalaya a·doko NPP-ko bilakatna, Garo Hills Autonomous District Council (GHADC)-ni tangka paisarangko jakkalsretenga ine Budbar salo, BJP-ni State Vice President aro Tura-ni MDC Bernard N Marak matnangataha.
GHADC-ni Executive Committee (EC)-ko da·o dipet NPP-sa chalaienga aro tangka paisarangko jakkalsretengani a·sel, GHADC-ko chu·gimik bon·atsrangna miksongenga ine Marak parakataha.
“GHADC-ni tangka paisarangko dingtang dingtang a·dokrango NPP party-ko bilakatna jakkalsretani a·sel, GHADC-o tangka paisana neng·nikanirangko man·enga. GHADC-ni ning·o donggipa dingtang dingtang biaprangko namroro silroroatchina miksonge chamatgipa tangka paisarangsa ong·achim. Indiba GHADC-ko NPP-chi dilenggipa Executive Committee-o BJP opposition-o ong·engani gimin, GHADC-ko chel·chakaniara BJP-ni daitoba ong·enga” ine Tura-ni MDC parakataha.
Bernard Marak-ni parakatani gitade, ANVC aro ANVC-B dolrang baksa songgigrikanichi Garo Hills-na namroro silroroaniko ra·bana gita ma·mong sorkari bang·en tangka paisarangko GHADC-na chamatahachim, indiba ma·mong sorkarini chamatgipa tangka paisarangoniko gong kror 50 mangkode NPP, party-tangni namgnina jakkalskaaha.
“Ian NITI AYOG-ni dongimin niamrangko pe·ani ong·a. ANVC dolrang baksa ma·mong aro a·dok sorkari, 2014 bilsio songgigrike soi ka·grikaha aro ia songgigrikaniara GHADC-ko bilakbatatna ong·achim. Indiba batanggimin bilsi 10-ni gisepo NPP-chi dilenggipa MDA sorkari, ia songgigrikaniko nichanggalaha aro ANVC dolrang baksa tom·anirangko ong·atani pal dingtang dingtang project-rangkosa ra·e katskaaha. Indake bang·a tangka paisarangkon NPP-ni dilgiparang jakkalsretaha” ine BJP-ni State Vice President matnangataha.
Batanggipa 2014 bilsini September 24 tariko ANVC aro ANVC-B dolrang Delhi songjinmao ma·mong aro a·dok sorkari baksa songgigrike soi ka·grikani ja·man, Garo Hills-na namroro silroroaniko ra·bana gita ma·mong sorkari bilsi 2015-2016-na gong kror 100.71 tangkarangko GHADC-na on·ataha, indiba ia tangkarangko NPP-ni dilgiparang, dingtang dingtang biaprango party-tangko bilakatna gitasa jakkalskaha ine BJP dilgipa matnangataha.
