Williamnagar Mar 4, 2025: Manderangni complaint-ko man·soe, Niksamso Garo Community Organisation (NGCO) HQ, Simsanggre, South Garo Hills a·jani Chokpot Civil Sub Division-ni ning·o donggipa, Bandari Govt. SSA Skul nokko nina gita re·angaha. Uamangni re·ange nianio nikani gitade, Bandari Govt. SSA Skul nok nosto ong·aha ine nikaha, uasan ong·aigija Garo Hills-ni dingtang dingtang biaprangon bang·a Govt. LP aro SSA skul nokrang nosto ong·atokaha ine NGCO parakataha.

Garo Hills-ni ning·tugipa songrango donggipa bang·a Govt. LP aro SSA Skul nokrangkon department nirokgija galchipani a·sel nosto ong·tokaha aro skulni skigipa Head Mistress ba Head Master-rang skul nokrang namjani bidingo Department-na u·iatna nanga aro Department-ni Officer-rangba bilsio changprak skul nokrangko nirokna nanga ine NGCO didiataha.

Garo Hills-ni bang·a biaprangon skul nokrang namjae, poraienggipa bi·sarang namen neng·nikaniko man·tokenga. “Chinga Garo Hills-o indakgipa obostarangko nike duk ong·a, department-ni officer-rang nirok simsakjani a·selsa bang·a Govt. LP aro SSA Skul nokrangan nosto ong·tokaha. Mikka wachio skul nokrang namgjani a·sel bi·sarang porikka sena man·jae, poraianiko dontongna ga·akenga aro songni bi·sarang namen ja·manchakaniko man·enga” ine NGCO parakataha.

Uni gimin, LP aro SSA Skulrango poraienggipa bi·sarangni namgnina, Garo Hills-o nosto ong·gipa pilak Skul nokrangko sandienba taripile on·china, NGCO, Education Department-ko didiataha.