Shillong, Feb 13, 2025: Meghalaya a·doko niam gri koelarangko cha·ue cho·enba, Assam aro Bangladesh a·songrangona salangenga ine bang·a matnanganirang aro badi ka·anirangko man·ani ja·man, niam gri koela cho·anirangko champengna gita koela cho·enggipa ba bikotenggipa biaprangko Drone-rangchi sandianiko dakchina,Justice (Retd) BP Katakey Committee-ni 27-gipa Interim Report-o ku·pattianiko on·aha.

Koborna parakani gitade, Meghalaya High Court-na on·gipa Interim Report-o, Justice Katakey Committee, koela bikotgipa mitam biaprangara namen ga·nanggijagipa aro garirang re·na man·gijagipa biaprang ong·ani gimin, niam gri koela bikotaniko sandirokna neng·nikanirang ong·engachim.

Meghalaya a·doko koela bikotgipa pilak biaprangkon Drone-rangchi sandianirangko dakna man·genchimode, niam gri koela bikotani aro salruraanirangko champengna man·genchim, ine Interim Report-o Justice Katakey Committee parakataha.

Niamgri koela cho·anirangko Drone-rangchi sandirokanirangko dakna gita Shillong-ni Pulis Headquarter-o donggipa SP-rangchi skie on·anirangko man·gipa DSP aro gipin pulis official-rangko songchina gitaba, Justice Katakey Committee, ku·pattianiko on·aha.

Drone-rangchi sandirokanirangko antiprakon report on·china, Justice Katakey Committee-ni Interim Report-o ku·pattiangaha. Uni gimin, East Jaintia Hills, West Jaintia Hills, South Garo Hills aro West Khasi Hills a·jarango M/S Garuda UAV Soft Solution Pvt. Ltd-ni Aerial Survey ka·aniko matchotatani ja·man, February 28 tarik ba una skang bon·kamgipa report-ko on·china Justice Katakey Committee, ge·etaniko on·aha.