Tura, April 4,2025: Meghalaya a·doko niam gri koela bikotenga aro niam gri koelarangko salenga ine matnanganirangko sandirokna gita songgipa Committee-ni sandirokanio, matnanganirang gitan sakkirangko man·enga ine Committee-ko dilenggipa BJP-ni State Vice President aro Tura-ni MDC Bernard N Marak prakataha.

“Niam gri koela bikotaniko jegalna man·jawa. Niam gri koela salruraanirangko bang·en nikna man·enga. Chingni am·sandie man·ani gitade, koelarangko Shalang-Athiabari rama gita Assam-ona salangenga. Ua rama gitan bang·a koelarangko salruraenga”, ine Marak parakataha.

Uani bidingo parakna gita jechakengon, uamangni report-ko bilakatna uarangko name nipilengkua aro pilakkon see rakkienga ine Marak parakataha.

East Jaintia Hills a·ja gita dakgipa koela a·damrangni bidingo sing·on, koela bikotenggipa pilak a·jarangonikon report-rangko tarienga ine BJP-ni State Vice President parakatenba, a·dokni bang·a biaprangon niam gri koelarangko bikotenga aro salruraenga ineba Marak aganaha.

Marak-ni aganani gitade, Committee-ni report-ko tariani matchotangengaha aro ia antini gisepon BJP-ni State President-na on·atgnok.

“Chinga report-ko tariengaha aro chingni sandie man·gimin pilakkon chimongaha. Sombar salo chinga report-ko matchotatgnok aro Mongolbar salode State President-na on·anggnok” ine BJP-ni State Vice President aganaha.

A·doko niam gri koela bikotani aro salruraanirangko am·sandie report on·china sal 40 somoiko Committee-na on·chengaha, indiba ja·mano Committee, antigni somoiko bi·dapskaaha. Niam gri koela bikotani aro salruraaniko am·sandianio, dingtang dingtang NGO-rangkoba sing·sandina aro koela a·damrangona re·ange sandina nangahachim.

Am·sandia matchote tarigimin report-ko skanggipa a·dokni BJP-na on·chenggen aro niamo pangchake ja·mano report-ko Delhi-o donggipa BJP-ni dilgiparangna on·atskagen ine Marak parakataha.