Chokpot, May 14, 2025: South Garo Hills a·jani Chokpot Constituency-ni ning·o ga·akgipa Dana Adugre songni Nokrek Adhoc UP Skul nok nosto ong·ahani gimin, ta·rake taripile on·china, Nokrek Area Development Committee (NADC), Monggolbar salo South Garo Hills s·jani Deputy Commissioner (DC)-na lekka sedoataha.
Dana Adugre songo donggipa Nokrek Adhoc Upper Primary Skulo VI-oni VIII-ona class ge·gittam donga aro ia songo UP Skulba ge·sa mangmangsan dongaiachim. Ia Skul nokni obostarang namsrangjani a·sel, skigiparang aro chatro chatrirang salanti class-rangko ra·anio namen neng·nikaniko chagrongna nangenga, ine NADC-ni Joint Secretary Salseng N.Marak parakataha.
Ia Skul nokking aro kelkirang nosto ong·an baksa do·garang dongjahani gimin wachini somoio skigipa aro chatro chatrirang salanti class ra·na aro Skul ka·na gita man·jaenga.
Unbaksana, class room-rangko plain sheet tin-rangchi tikchanggipa pakmarangba nosto ong·aha. Ia Skulko bilsi 10 mangna baten, chalaiaha, indiba nosto ong·ko taripile on·na dongja, ine janapatenba, ian skigiparang aro chatro chatrirangna namen ra·biani ong·akaenga ineba Marak parakataha.
Ia skul nok nosto ong·an baksa chatro chatrirangna Mid-Day-Meal ba misal song·e, on·na gitaba babilsi dongjani gimin skigiparang aro helper-rang namen neng·nikaniko chagrongna nangenga ine, Dana Adugre songni Nokma John Ch.Marak parakataha.
Uni gimin, “Ia chingni songo ge·sa mangmang donggipa Nokrek Adhoc UP Skul nokko ta·rake taripile on·pachina, bil gnanggipa department-ko aro district administration-ko mol·molatpaenga. Jedakode, ia songo dongenggipa chingni bi·sarang mikkangchi namgipa skie ra·ani cholko man·pagen” ine Dana Adugre songni Nokma didiataha.
