Ampati, May 30,2025: A·chik Holistic Awakening Movement (AHAM), South Western Zone Ampati, Sukrobar salo Meghalaya Power Distribution Corporation Limited (MePDCL) Department, Ampati Division-o adita Casual Worker-rangko wachikarini somoio rakkidapchina mol·mole, South West Garo Hills a·jani Deputy Commissioner-na chitti sedoangaha.

AHAM South Western Zone-ni parakatani gitade, South West Garo Hills a·jani bang·a dingtang dingtang songrangon, salanti walanti changni chang bijoli sisimsimani a·sel, jolni manderang neng·nikanirangko man·tokenga.

Iani bidingo, AHAM-ni dilgiparang MePDCL Department baksa agangrikon, chu·onga gita kam ka·giparang dongjani a·sel somoi gita ta·rake kamrangko ka·na aro Somoi gita bijolirangko sokatna man·jaenga, ine department-ni officer-rang aganchakaha.

Uni gimin, kam ka·giparangko komibeoba sak 12 mang Casual Worker-rangko kamo rakkidapchina, AHAM South Western Zone dabiangaha.

Casual Worker-rangko kamo rimnapchina dabienggipa kamrangara
sak 2 Lower Division Assistant (LDA), sak 2 Meter Reader-rang aro sak 8 Field Worker-rangko kamo rakkidapchina AHAM-ni seatgipa chittio janapataha.

Ia janapgimin kamrango, manderangko rimnapgenchimode, department-o kam ka·soenggipa staff-rang baksa apsan nambate kamrangko ka·na man·gen aro bijoli tik ong·gijarangko ta·rake tarina gitaba man·gen, ine AHAM South Western Zone-ni President, Wester G.Sangma parakataha.