Shillong, May 31,2025: Meghalaya a·dok gimikon mikkarang jimbee waenganichi chirang banengani gimin a·doko songdongenggipa manderangko mikrake dongchina Indian Meteorological Department (IMD)-oni u·iataha.
IMD-oni u·iatani gitade, May 30 tarik Sukrobar salo, Meghalaya a·dokni East Khasi Hills, South West Khasi Hills, East Jaintia Hills, West Jaintia Hills, Eastern West Khasi Hills, Ri-Bhoi aro Garo Hills-ni pilak a·jarangon mikkarang jimbee wagen ine parakataha.
A·dokni bang·bata biaprangon, mikkarang baksa balwarangba kontaprako km 40 ba 50 ka·e, mitam biaprangode km 60 ka·e balani chol donga ine IMD u·iataha.
Indake ong·engon, May 31 tarikoni June 3 tariona kingking Meghalaya a·dok gimikon mikkarang jime waangkugen ineba IMD-oni u·iataha. Mikka baksana badiaba biaprangode balwarangba aditan ta·rakgen.
Re·baenggipa salrango mikkarang dontonggija waangkua ong·ode, East Jaintia Hills, West Jaintia Hills, East Khasi Hills, West Khasi Hills, Ri Bhoi aro Garo Hills gimikon chi bananirang donggen ineba IMD mikrakataniko on·ataha.
Kenchakna nangbatgipa biaprang jekai chi rikamrangona skatang re·angjachina, man·a dipet noko nape dongchina, Disaster Management Department aro IMD ge·etanirangko on·ataha.
