Williamnagar, May 6, 2025: Soil & Water Conservation Department-ni Minister Marcuise N Marak, Monggolbar salo Songsak C&RD Block-ni ning·o donggipa Napak A·pal songni Silang A·bri Catchment Rejuvenation Project-ni gimin manderangna talate on·na gita tom·aniko ong·atangaha. Ua tom·anio Rongjeng-ni MLA Jim M Sangma, State Planning Board-ni Co-Chairman Nihim D Shira, songni Nokmarang aro gipin dilgiparang dongpae bak ra·angaha.

Rejuvenation Project-ni gita song dam 10-na namgnirangko on·gen ine aganangenba, ia nitogipa Silang A·briko Tourist Spot ba Tourist biap tarina miksonganiko Marak jinmana talatangaha. Uasan ong·aigija, songni manderangna bang·a namroro silroroaniko ra·bana dakchakaniko on·gen aro uamangni janggi tanganiko namdapatna gita sorkari baksa bakrime kamko ka·china, ua didiangaha.

Ua tom·anio Soil & Water Conservation Department, Simsanggre (T)-ni Divisional Officer, Corbeth HD Sangma-ba dongpae, ua Project-ko chu·sokatna gita songni Nokmarang dakchakaniko on·pachina didiangaha.

Rongjeng-ni MLA Jim M Sangma, Nihim D Shira, Napak A·pal-ni Assistant Pamong Demingstone D Sangma aro Garo Heritage Village-ni Secretary Rakkan M Sangma-ba tom·anio dongpae jinmana agan-ku·pattie on·angaha.