Tura, Nov 28, 2024: Khasi Hills-ni ning·o ga·akgipa A·chik songrango A·chik Nokma songaniko, KHNAM-ni President Ban Thomas Passah, KHADC-ni CEM PN Syiem-na November 27 tariko seatgipa chittina Garoland State Movement Committee (GSMC) CEC, HQ Tura aganchakaniko on·atskaha.
GSMC-ni aganchakatani gitade, A·chikrang skang chengonin Dakgipa Rugipa, A·ko Chiko ong·atchengaonin, Mughal Rajarangni Salgro Salaram a·dokrangko napdrae ra·sekna skangonin, British sipairangni re·bae, dokkol ka·na skangan, A·chikrang ua biaprango jakgitele songdong a·chagiparang ong·achim aro gimikan A·chik a·song ong·achim.
Indiba,1947 bilsio India jakgitelko man·ani ja·man, Garo Hills District, Khasi aro Jaintia Hills-ko bak dake district songaha. Ua somoio bang·a A·chikrangni A·kingko Khasi Hills-o chapataaha ine GSMC parakataha.
Uandake, A·chikrangni daka rikani sason ka·ani A·king Gore-ko nirok simsakani da·alonaba apsan ong·kuenga. Uni gisepon, da·alo Kaun Hynnewtrep National Awakening Movement (KHNAM), A·chikrangni Nokma songaniko jegale agananira, ra·chakna man·gijani ong·a ine GSMC-ni Organising Secretary Jason Tekrang M.Sangma parakataha.
Uni gimin, Khasi Hills-o songdongenggipa A·chikrangko maming dakeba onchepjachina, GSMC didiataha. Uni gisepon, Khasi Hills-ni A·chik Nokmarangko ba A·chik songrangko Khasi Hills-o ra·chakna man·jahenchimode, Garo Hills-ni bako chapatskachina, GSMC dabiangskaha.
