Baghmara, Feb 20,2025: South Garo Hills a·jani Alagre Songgital WSS-ni ning·o Jal Jeevan Mission (JJM)-ni kamrangko matchotchipgija donenga ine Budbar salo, Garoland State Movement Committee (GSMC) Ashuragre Regional Unit aro Federation of Khasi Jaintia & Garo People (FKJGP) Chokpot Circle, contractor-ni kosako Sangknigre Pulis Station-o FIR ka·doangenba, South Garo Hills a·jani Deputy Commissioner-na badi ka·doangaha.

Dolgni NGO-rang ua JJM-ni kamrangko nina re·angani ja·man contractor Morjina Marak aro uni segipa Chenang Sangma-ni kosako badi ka·doangaha.

NGO-rangni parakatani gitade, Allagre Songgital WSS-ni ning·o song 13 songrangko man·gopachim. Indaken ia JJM project-na gong 3,48,47,620 kror tangkaranko sanctioned ka·ahachim aro ia project-ko matchotahaode ian Chokpot C&RD Block-ni ning·o donggipa Ala Nokatgre, Ala Rongpakgre, Alagre, Anigre, Asinanggre, Ashugre, Debaigre, Deku Bazar, Gadak Nawepilgre, Ganchi Kalak, Kama Anigre, Nachi Adugre aro Rimrangpara Adinggre songrangna namgni ong·gnokchim.

Ia project-ni bidingo RTI ka·e am·sandion, ia JJM-ni kamrangko 2021 bilsini July 16 tarikon a·bachengate, bilsisani gisepon matchotani ong·achim. Indake ong·genchimoba, biapona re·ange nion, ia songrangna chirangko on·na man·kujaenga ine NGO-rang nikna man·aha.

Ia kamko jako ra·gipa contractor aro uni segipa, kamrangko nirokachim, indiba ia kamni bidingo songni manderangna parakjaha ine dolgni NGO-rang matnangataha.

Ia JJM project-ni kamrangko a·bachengkujaoba, tangkode gong kror 1.86-ko oke ra·aha ineNGO-rang, contractor-ni kosako matnangataha.

“Ia tangkarangko manderangni namgninasa sorkari on·ataha, indiba kam ka·gija contractor, angka paisarangko jakkalsretaha. Ia kamko matchotatchina chinga uamangko changni chang mol·molahachim, indiba uamang kamko chu·sokatchipjahani gimin chinga ia contractor aro uni segipani kosako FIR ka·enga,” ine GSMC Ashuragre Unit aro FKJGP Chokpot Circle parakataha.