Tura, May 19, 2025:Garo Hills Autonomous District Council (GHADC)-o Sumit Kumar Jain Borah-ko Consultant rakkianiara, indita skia man·gipa A·chik chadamberangko cha·bokani ong·a, ine Tura-ni MDC Bernard N.Marak matnangatkuaha.

GHADC-o tol·gipa Chartered Acountant-ko rakkie, gong kror 8-na batpile, tangka gamaniara Garo Hills-ni skia poraia man·gipa A·chik chadamberangko cha·bokni ong·a. Jemangan office ge·antiona re·roroe, kamrangko sanditokengon, class X pass ka·gipa mandeko Chartered Accountant rakkianiara skia man·gipa aro Chartered Accountant-na kragipa A·chikrangko chonnika ga·aka ine Marak parakataha.

GHADC-ni dilgiparang A·chik chadamberangko nikchanggale kam ka·aniara, A·chik a·songni skia man·gipa chadamberangko cha·boka ga·akchongmota, ine Tura-ni MDC aganaha.

Marak-ni matnangani gitade, Sumit Kumar Jain Borah class X-kosan pass ka·aia, intermediate-ko matchotja. GHADC-o Chartered Accountant rakkigipa Jain Borah class XII-kon matchotja. Indiba GHADC-ni ruling EC-rang aro Officer-rangko tol·e cha·bokna man·enga, ine Marak parakataha.

GHADC-ko sason ka·enggipa MDC-rang, Commerce pass ka·pilgipa A·chik Graduate-rangko ia kamo rakkipilgija, class XII pass ka·gijagipa gipin jatkosa kamo rakkiakaha. Uandake, uamangni daka kamara A·chik chadamberangko cha·bokani ong·chongmota, ine Tura-ni MDC matnangaha.

Tax Consultant-ni kamko ka·na komibeoba, Batchelor Degree-ko pass ka·gipa ong·na nanga aro kamo sapgimin ong·na nanga, unbaksana Business Administration Economics, Finance ugita nangchapgipa gipin kamrangko ma·sigimin ong·na nanga. Indiba Sumit Kumar Jain Borah-de, maming degree-ba dongja, ine Marak matnangataha.