New Delhi, May 11, 2025: Re·anggipa April 22 tariko Jammu aro Kashmir-o donggipa Pahalgam tourist biapo Pakistan a·songni bobil dolrang, Indiani sak 26 ramram manderangko chadrape so·otani bidingo, Indiaba bobil dolrangko a·jak sokskana, “Operation Sindoor” ine bimingko done, Indiani Army-rang May 7 tariko chadrape bobil dolrangni dongnuchakenggipa dam 9 biaprangko nosto ka·e galskaaha.

Indaken a·song damgnini gisepo May 7 tarikoni May 10 tarik pringona bilakgipa silchirang aro bomarangchi, India aro Pakistan a·songni sima arirango gogrikani a·sel adita sak manderangni janggirang gimaaha aro mitamrang saknaako man·tokaha.

Indake ong·engon, a·song damgnini gisepo tom·tomgrikaniko ra·bapilna, US-ni President Donald Trump, India aro Pakistan a·songni dal·dalgipa dilgiparang baksa waltongsa agan-golpogrikdilani ja·man, India aro Pakistan Donald Trump-ni agangipa kattao pangchake tom·tomaniko ra·bapilna ku·rachakgrikaha, ine Indiani Foreign Secretary Vikram Misri dingtang dingtang News Channel-rango parakataha.

Uandake, tom·tomaniko ra·bapilna gita, Pakistan-ni Directors General of Military Operations (DGMO) aro Indiani Directors General of Military Operations (DGMO)-ko okame, May 10 tarik Sonibar attamni 3:35 bajio golpogrikaniko dakenba, gogrikanirangko dontongna songgigrikaha, ine Misri parakataha.

“India aro Pakistan a·song damgnian dolsa dolgipinko nisan done gogrikengani gimin US a·song damgnini gisepo agan-golpogrikaha. Da·al ia agangrikani namgipa biteko ra·baaha. A·song damgnian dakgrikaniko dontongna chandal mitugrikaha aro iako parakna anga namen kusi ong·a, uni gimin a·song damgninan angni nama sikaniko on·atenga” ine US-ni President Donald Trumph aganaha.

US-ni Secretary of State Marco Rubio, Indiani External Affairs Minister S.Jaishankar aro Pakistan-ni Foreign Minister Ishaq Dar aro Pakistan Army-ni dal·batgipa General Asim Munir-na u·iatani ja·man, Donal Trump-ni agangipa kattarangko parakataha.

Indake, Indiani Prime Minister Narendra Modi, Pakistan-ni Prime Minister Shehbaz Sharif, Indiani Foreign Affairs Minister S.Jaishankar, Asim Munir, Ajit Doval aro Asim Malik mang baksa agan-golpogrikaniko dakenba, dolgnini dilgiparang tom·tomgrikaniona re·chakatna ku·rachakgrikaha. Uamangni chanchininge kam ka·anichi da·alo a·song damgnini gisepo dakgrikanirangko dontongna re·chakatani chu·sokaniko man·ahani gimin, US President kusi ong·aniko parakataha.

Pakistan aro Indiani dal·dalgipa dilgiparang tom·tomgrikanina mikasale chanchigrikaha. Sonibar attamni 5:00 baji dipet a·song damgnini gisepo gogrikaniko dontongaha aro chandal mitugrikaha, indiba May 12 tariko a·song damgnini dilgiparang agangrikaniko daktaigen ine Misri parakataha.