Tura, Oct 23,2024::November 13 tariko ong·atenggipa Gambegre by-election-na nomination file ka·aniko Sombar saloni a·bachengatengon, skanggipa Independent candidate Sengkrabirth Marak, Monggolbar salo Tura DC office-ona re·bae Returning Officer-ni mikkango nomination file ka·angchengaha.

Bilsi 26 ong·gipa Sengkrabirth Marak-ni nomination file ka·ani salo nokdangni manderang aro una chakpaenggipa manderang dongpaaha.

Ua an·tangni election-o susana lekkarangko Returning Officer-na on·ani ja·man kobor ra·timgiparangna aganengon, ua an·tang chol ong·gipa mande ong·jaoba, Gambegre constituency-ni manderang uko namnike MLA seokgenchimode, ua manderangni namgnina kamrangko ka·gen ine aganaha.

“Anga an·tangde man·e cha·gipa ong·pajani gimin, da·odipetde manderangna maiko dakna man·gen, uko aganna man·kujawa, indiba Gambegre constituency-ni manderang angko kranike MLA seokgenchimode anga manderangni namgnina aro uamangni nangnika gitan kamrangko ka·gen” ine Marak aganaha.

Da·o Gambegre by-election-o Congress, NPP, BJP aro dal·dalgipa party-rang baksa susaengani gimin sing·on, ia pilakan manderangni nangnikani aro Isolni sikaniosa pangchakgen, maina Isolni sikani ong·genchimode, manderang, MLA seokaigen ine Independent candidate aganaha.VIa chasongo somoirang dingtangahani gimin manderangna kam ka·na chadamberangkosa nangengaha ineba Marak aganaha.

“Basakona an·ching bilgrigiparangko aro bilsi brigimin manderangko seokchae donggen. Bilsi re·angahaode bilgria, uni gimin ia chasongo chadamberangna cholko on·ani ong·engaha” ineba ua aganaha.

Gambegre constituency-na mai namdapanirangko nangenga ine sing·anina aganchakengon, Gambegre-o bang·en namdapataniko nangkuenga, mongsongbate re·a doani rama jal·lang, sanna banani biaprang, namgipa skichakanirang, chadamberangna janggi tangani cholrangko skie on·anirang dongkuja, iarangko nangchongmotenga ine Sengkrabirth Marak aganaha.