Tura, April 4, 2025: April 4 tarik Sukrobar salo Garo Hills Environment Protection Society (GHEPS) baksa Meghalaya State Pollution Control Board Shillong, East Garo Hills Social Forestry Division-ni DFO, Rongsak Baptist Mondoli aro East Garo Hills-ni dingtang dingtang NGO-rang bakrime, chang 21-gipa Environment Awareness Program-ko Rongsak Government Higher Secondary Skul biapo ong·atangaha.
Ia program-o Williamnagar-ni MDC Alphonsus R.Marak mongsonggipa sokgipa ong·e, A·chik a·songo nosto ong·angenggipa environment-rangko, mikkangchi name ripingangpilna tom·bagipa sakantina nama ku·patianiko on·anga baksa ku·mongangaha.
Unbaksana, East Garo Hills Social Forestry Division-ni MFS Lister M. Momin, plastic-rangko jakkalanichi mai namgijanirangko man·achim, projector screen-rango agan-talate on·angskaha. Uandake, GHEPS-ni President Dr. Merril N.Sangma-ba gimaangenggipa Isolni pattigimin A·chik a·song, chiring chibisikrang, buring bolgrimrang do·o matrang aro sam bolrangko mikkangchi maikai tangatpile ripingangpiltaina man·gen, agane ku·patianiko on·angaha. Una agreba Samanda St. George Higher Secondary Skulni Principal Rev. Fr. Jimberth K. Marak-ba program-o dongpae, A·chik a·songni nitobegipa burung bolgrim, a·ningni gamrangko ripingani bidingo ga·subee git ringangaha.
Uandake ua jolni Nokmarang bang·a songni nokni manderang aro dingtang dingtang Skulni chatro chatrirangba re·bae program-o bak ra·angtokaha.
Indake program matchotani ja·mano jinma Rongsak Higher Secondary Skul Compound-o bolrangko ge·angjolaha.
