Tura, Aug 24,2024:Garo Hills Autonomous District Council (GHADC)-o kam ka·enggiparang ja 34-ni dormaharangko man·jani gimin, uamangni dormaharangko on·china dabie, re·anggipa August 19 tarikoni 23 tarikona sal 5 asonge jingjengatani Sukrobar salo matchotangaha.
GHADC-o kam ka·giparang, ja 34-ni dormaharangko man·kujaengani gimin nokdangko chalaianio, dedrangko skul admission ka·anio, Skul fees gamanio aro sagipa ding·giparangko sanna bananio namen neng·nikaniko man·engani gimin, Non Gazetted Employees Association (NGEA)-ni dilachi, DC-ni on·gimin permission-o pangchake, Tura Govt College Field-o sal 5-na asonge jingjengatangaha. Uni gisepon, jasani dormahako gitcham fourth pay scale-o on·na gita order-ko on·aha. Indiba batanggipa somoionin fifth pay-ko on·china dabiengahani gimin, chinga gitcham fourth pay-ko ra·chakna man·jawa ine parakatskaha.
“Chingna jasani dormahako gitcham fourth pay scale-o on·na order on·aniara ra·chakna man·gijani ong·a. Chinga ja 34-na dangdike on·aha. Indake ja 34-ni dormaharangko man·jani a·sel chinga salsa bate bate neng·nikanirangko man·batroroahani gimin, chinga chakchikna amjae jingjengataona sokaha. Chingaba mandesan ong·e, salantion dingtang dingtang nanganirang gnang. Uni gisepon, chingna gitcham fourth pay-ni dormaha maming dakeba chu·ongja, uni gimin chinga fourth pay-ko ra·chakna man·jawa, ine parakatenba chingni man·na nangenggipa ja 34-ni dormahako fifth pay scale-o on·china dabie jingjengatna tik ka·aha.
Chingni dormarangko on·china changni chang dilgiparangko mol·molaha. Indiba GHADC-ni dilgiparang chingni mol·molaniko knachakjani gimin, GHADC-ni dilgiparangna chinga sal 12 somoiko on·aha, uni gisepon, August 13 tariko CEM aro gipin EM-rang, chingko okame agangrikani somoion, chinga gitcham fourth pay scale-ko ra·jawa ine aganahachim. Uni gisepon, chingna jasani dormahako gitcham fourth pay-ko on·taina order on·aniara ra·chakna man·gijani ong·a. Uni gimin, chingni dabienggipa fifth pay-ko on·kuja dipetna chinga jingjengataniko dontongjawa. Da·o sal 5-na jingjengatani matchotangahaoba, re·baenggipa August 27 tarik Monggolbar saloni ia apsan Govt College Field-on jingjengataniko dakangkugen” ine NGEA-ni President Brithen M.Sangma parakataha.
“Chinga ja 34-na authority-rangni kal·ake on·gipa fourth pay scale-ko ra·chakaha. Indiba da·aldipet, chinga fourth pay-ko ra·chakjawa. Jena kingking chingni dabienggipa fifth pay scale-ko on·ja, jingjengataniko dontongjawa. Chingna fifth pay scale-o dormaha on·china gitan batanggipa 2017 bilsion a·dokni Governor ge·etaniko on·manaha. Indiba GHADC-ni EC-rang financial position namgijako pa·sike, na·simangna financial position namjoko fifth pay-ko on·gen, ine ku·rachakahani gimin, chinga 2017 bilsioni da·alona kingking sengaha. Indiba chingni neng·nikanirangko dilgiparang ma·sichakja aro kal·ake roani a·sel, chinga da·alo jingjengataniko dakna draatako man·aha” ineba Brithen Sangma aganaha.
