Tura, Aug 22,2024:Garo Hills Autonomous District Council (GHADC)-o kam ka·enggiparang ja 34-ni dormaharangko man·jaengani gimin, re·anggipa August 19 tarikoni asonge jingjengata August 22 tariko salbri gapaha.
GHADC-o kam ka·enggiparang, Non Gazetted Employees Association (NGEA)-ni dilachi, re·anggipa August 19 tarikoni a·bachenge, 23 tarikona Tura Govt. College Field-o asonge jingjengatna tik ka·enba jingjengataniko dakengaha. Uni gisepon, brigipa salo jasani dormahako gitcham fourth pay-o on·na gita order-ko on·aha ine koborko on·ataha. Indiba batanggipa somoionin fifth pay-ko on·china dabiengahani gimin, gitcham fourth pay-ko ra·chakna man·jawa ine parakatskaha.
“Chingna jasani dormahako gitcham fourth pay-o on·na order on·aniara ra·chakna man·gijani ong·a. Chinga ja 34-na dangdike on·aha. Uni gisepon chinga salsa bate bate neng·nikanirangko man·batroroaha. Indake ong·engon, gitcham fourth pay-ni dormaha chingna maming dakeba chu·ongchongmotja, uni gimin chinga fourth pay-ko ra·chakna man·jawa. Chingni man·na nangenggipa ja 34-ni dormaha baksa fifth pay-ko dormaha on·china dabie jingjengatna jinma tik ka·enba, GHADC-ni dilgiparangna sal 12 somoiko on·ani gisepon, August 13 tariko GHADC-ni CEM aro gipin EM-rang, chingko okame agangrikmiting somoion, chinga gitcham fourth pay-ko ra·jawa ine aganahachim. Uni gisepon, chingna jasani dormahako gitcham fourth pay-ko on·na order on·aniara ra·chakna man·gijani ong·a. Uni gimin, chingni dabienggipa fifth pay-ko on·kuja dipetna chinga jingjengataniko dontongjawa” ine NGEA-ni President Brithen M.Sangma aganaha.
“Chingni man·gni dormaharangko Fifth Pay Commission-o on·china dabie, sal 5 asonge jingjengatengon, chingni dabianiko chu·sokatja ong·ode, sal 5-ni ja·manba, sima ari dongija jingjengatangkugen” ine Brithen Sangma parakataha.
“Chinga ja 34-na authority-rangni kal·ake on·gipa fourth pay-ko ra·chakaha. Indiba chinga da·aldipet, fourth pay-ko ra·chakjawa. Jena kingking fifth pay-ko dormaha on·ja, jingjengataniko dontongjawa. GHADC-o kam ka·giparangna, fifth pay-ko dormaha on·china batanggipa 2017 bilsion a·dokni Governor ge·etaniko on·manaha. Indiba GHADC-ko chalaienggipa EC-rang financial position namjoko, na·simangna fifth pay-ko on·gen, ine ku·rachakahani gimin, chinga batanggipa 2017 bilsioni da·alona kingking sengaha. Indake chingni neng·nikako dilgiparang ma·sichakjani gimin, chinga jingjengataniko dakna draatako man·aha” ine NGEA-ni dilgipa parakataha.
