Tura, Feb 19, 2025:Garo Hills Autonomous District Council (GHADC)-ni ning·o ra·dapgipa Mouza 5-oni Mouza 10-ona a·a pattarangko on·aniara Sixth Schedule-na on·gimin bil aro niamni a·palo ong·enga, ine Tura-ni Social Activist Mark Flaming B Marak parakatenba, ua on·dapgipa ba ra·dapgipa Mouza-rangko ra·galpilchina GHADC-ni CEM-ko didiataha.

Flaming Marak-ni parakatani gitade, GHADC-ko a·bachengaonin, Garo Hills-o Mouza 1-oni Mouza 4-onasan dongaia. Ia GHADC-ni ge·bri Mouza-rangara Mouza number 1, 1-oni 9-ona Kelland S.Marak-ni ning·o ga·aka, Mouza 2, 2-10-oni 11-23-ona Minison Ch.Marak-ni ning·o, Mouza 3-24-oni 45-ona Ringseng Ch.Marak-ni ning·o aro Mouza 4-46-oni 60-ona Crossline R.Marak-ni ning·o ga·aka.

Iani bidingo GHADC-ni Chief Executive Membor (CEM) Albinush R.Marak aro Executive Member (EM), ia on·dapgipa Mouza-rangko namedake sandiani ja·mano ra·galpilchina Social Activist didiataha.

“Mouza V-oni 10-ona ra·dapgipa biaprangna a·a pattarangko on·na gita GHADC bil donga ine a·kangenba GHADC-ni dilgiparang dingtang dingtang sorkari department-rangna, corporation-rangna, company-rangna, agency-rangna aro gipin jatrangna a·a pattarangko on·enga ine janapatenba, ian niamni a·palo ong·a ine ra·dapgipa Mouza-rangko ra·galpilna nangchongmota”, ine Flaming Marak, GHADC-ni CEM aro EM-na sedoatgipa chittio janapataha.

GHADC-ko a·bachengaonin Garo Hills gimikon, Mouza ge·brisan dongaia ine janapatenba, GHADC-ni ning·o 5-oni 10-ona Mouza-rangko ra·dapna ba chalaina bil dongja, ian niamni a·palo ong·a ine Flaming Marak janapataha.