Tura, Sept 6,2024: Garo Hills-o skanggipa changna Coffee Growers ba coffee-ko ge·e game cha·enggipa manderang baksa Profit Sharing ba lapko sualgrikani program-ko West Garo Hills a·jani Oragitok songo ong·atangaha.
Ia program-ko Babadam-o donggipa, All Garo Hills Multi Purpose Cooperative Society (AGHMPCS), Durama MPCS baksa nangrime ong·atangaha. Indake ia program-ko ong·atanio Meghalaya Basin Management Authority [MBMA] aro Tura-ni Coffee Board dakchake on·aha.
Ia program-o, West Garo Hills a·jani Deputy Commissioner Jagdish Chelani, mongsonggipa sokgipa ong·e jinmana aganprakangengon, coffee ge·e cha·enggiparangni baksa ian skanggipa changna apsan chanchirimani ong·enga aro laprangko sualgrikani program ong·a. Ia jolrango coffee man·a ine ma·sijachim ine ua aganaha.
Ia jolrangoniko kg 12,000 coffee-rangko gipin biaprangona ra·angna man·aniara ia jolrango kraa gitan coffee ge·aniko mesokani ong·enga, ineba ua aganaha. An·tangni bil ama gita ua coffee ge·giparangna pilak nanga dakchakanirangko on·na kusi ong·aigen ineba Deputy Commissioner ku·rachakangaha.
Indake, tom·anio AGHMPCS-ni Director Rev Fr Sunny Mavelil-ba dongpae jinmana aganprakangengon, a·dok sorkarini tangka paisarangko dakchake on·anichi ia AGHMPCS-ba Cooperative Society-ni gita chalaina man·enga aro ia jolrango songdongenggipa manderangni janggi tangani gadangko namdapatna man·enga ine parakangaha.
Durama MPCS-ko 2022 bilsio kuliahaon, ia jolrango man·gipa kg 1200 coffee-rangko bree Shillong-o paleaha, indiba coffee-rang namgipa ong·jani a·sel inditana laprangko man·jaha ine Rev Mavelil aganaha.
Una skangde, ia jolrango coffee ge·e cha·giparang, gong 15-20-mangnasan palaiachim aro ia jolrango ge·gipa coffee-rangko palani ja·man da·o ia jolrango coffee ge·e cha·giparangna laprangko suale on·na man·engaha ine AGHMPCS-ni Director aganangskaha.
Ia program-ko ong·atanio, Tura Coffee Board-ni official Md Sun Muhamad Ali aro gipinrangba dongpae bak ra·angaha.
Ja·mano, coffee ge·giparangna West Garo Hills a·jani Deputy Commissioner Jagdish Chelani, coffee pale man·ani laprangko suale on·angaha.
