Tura, Oct 7, 2024: Salgni joljol mikkarang dondikgija waanichi Garo Hills gimiko mande sianirang sak 15 gapaha.

Sonibar walo, Songsak ramao bol pangsa gari bolsako be·dapanichi gari salgipa saksa a·damon siaha aro Rongjeng Gongdap songo nok te·sako a·a rurongdape, ma·ningsa sakgni Amerin K.Marak aro uni demechik Manase K.Marak janggitangko gimaatskaha.

East Garo Hills a·jani SP AS Rynjah-ni u·iatani gitade, Robibar pringwalo, Rongjeng Pulis Station-ni ning·o donggipa Gongdap songo, nok te·sako a·brini a·arang rurongdapaha aro noko tusienggipa nokni ma·gipa aro uni demechik, a·a dapako man·e siaha. Ua ma·ningsani manggisiko ra·ongkatenba hospital-ona ra·angaha.

Songsak-o ong·gipa a·selara Sonibar walpaksachibara ong·aha aro ua somoio Thenseng R Marak baksa me·chik sakgni Dalu-oni Rongjeng-ona re·angengachim. Uamang Songsak Reserve-ko re·angmiting somoio rang·san dal·begipa bol pangsa uamangni gariko be·dapaha aro Thenseng Marak, biapon siaha.

Uamangni re·anggipa gariara ML-08J-1279 Renault Kiger ong·achim aro sianggipa mandeara Dalu Thibapara songoni ong·achim. Ua a·sel ong·anio dongpagipa me·chik sakgniara, Dalu Thibapara songoni bilsi 29 ong·gipa Sengrikchi D Sangma aro bilsi 27 ong·gipa Clarinda D Sangma ong·achim, uamang bilongbee saknaaniko man·aha. Uamang sakgniko a·sel ong·ani ja·mano Songsak PHC-o sanna bananiko dakenba, Williamnagar hospital-ona ra·angskaha aro uni ja·mano Tura Civil Hospital-ona ra·angtaiaha.

Re·anggipa Bristibar salonin Garo Hills gimikon mikkarang dondikgija waanichi a·arang rurongdape, chirang banne, Sukrobar salo West Garo Hills a·jani Dalu jolo sakgittam manderang siangangha. Uandake, Sukrobar walo Gasuapara jolo donggipa Atisia Songmong-o nokdang ge·sani sak 7 manderangko a·a rurongdapaha. Apsan Sukrobar salon, paningsa sakgni bilsi 44 ong·gipa Bijoy S.Sangma aro bilsi 13 ong·gipa uni depante Wian Chigado R.Marak-ko, uamangni gario re·bamiting somoio, Dimapara jolo Bugai Chibima man·pakangaha aro uamangni manggisiko Robibar pringosa SDRF sipairang sandie, adita chel·gipa biaprangoniko man·aha.

Garo Hills-o indake mikkarang dondikgija waanichi a·arang ruronganio aro chirang bananio neng·nikanirangko man·enggipa manderangna dakchakanirangko on·china a·dokni Skotong Minister Conrad K Sangma, District Administration-rangna ge·etaniko on·ataha. Iandakgipa a·sel ong·achi sianggipa manderangni nokdangrangna tangka paisarangko on·china gitaba Skotong Minister ge·etaniko on·ataha.

Unbaksana, champengatako man·gipa ramarangko sandie on·china gitaba District Administration-rangko didiataha aro chi pe·anggipa dollongrangko Bailey Bridge ba ta·rake rikna man·gipa silni dollongrangko tarichina Skotong Minister ge·etaniko on·angaha.