Tura, Nov. 6, 2024: Re·baenggipa November 13 tariko ong·atenggipa Gambegre by-election-ko National People’s Party (NPP)-an chena gita nambatgipa chol ong·enga ine Mongolbar salo, Tura-ni gitcham MP Agatha K Sangma a·kangataha.
Gambegre by-election-ni bidingo kobor ra·timgiparangna aganengon, Gambegre constituency-o namroro silroroaniko ta·rake man·na gita constituency-ni manderang, sorkario bak ong·gipa MLA-kosa nangniktokengani gimin Gambegre by-election-ko NPP-an chena ka·dongenga ine Agatha Sangma parakataha.
Ia by-electiono susaenggipa NPP-ni candidate aro Skotong Minister Conrad K Sangma-ni jikgipa Dr. Mehtab Chandee A Sangma poraia gadang dongan baksa u·ianirang dongani gimin, jolni manderangna maiko dakna changanichi uan chegipa ong·gen. A·dokni Skotong Minister aro uni pilak Minister-rangan Gambegre-o vote bi·amtokenga ine Tura-ni MP Saleng A Sangma-ni agangipa kattako Agatha Sangma jegalatskaha.
“Politics-o kam ka·giparang an·tangtangni candidate-na rakbee kam ka·enga ong·ode aro Skotong Minister an·tangan somoiko on·e kamko ka·enga ong·ode, chingni gisiko nanganiko mesokani ong·a. Election-kode maming saloba altue ra·na nangja ine chinga ma·sia” ine Agatha aganaha.
Tura-ni Congress MP Saleng Sangma iandakgipa kamrangko name sandichengna nanga aro ua saksa MP ong·e skatang kattarangko aganna nangja ine Agatha matnangatenba, Gambegre by-election-o susaenggipa pilak candidate-rangan namgiparang ong·a, indiba ia election-o NPP-an skang ong·enga ine Agatha a·kangataha.
Re·anggipa Lok Sabha electiono Tura Parliamentary Seat-o amako man·aniara una dal·bea gimaani ong·aha, indiba una skie ra·ani ong·skaha aro mikkangchi nambate re·mikkangangkuna nanganiko Sangma parakataha.
