Tura, April 13,2025: Meghalaya Legislative Assembly-ni Leader of Opposition (LO) ba warachakenggipa dolni dilgipa Dr. Mukul M. Sangma, Meghalaya a·dokni skanggipa State University (SU) jekon Captain Williamson Sangma State University (CWSSU) ine mingachim, Sukrobar salo re·ange nieaha. Uni (Dr Mukul) re·ange nianio nikani gitade, kamrang matchotaha, indiba bang·a namdapatna nanganirang dongkuenga ine aganaha.
Dr. Sangma State University-ni Vice-Chancellor (VC) aro Registral Ambrush Ch.Marak-ko gronge, State University-ko chalaiani bidingo, maidake chalaianggen, basakoni class-rangko a·bachengatgen agangrikanio, Senior Citizen-ni dilgiparangba dongpae bang·a namdapatna nanganirangko agandapangaha.
A·doktango skanggipa changna State University-ko man·bahani gimin, Dr.Sangma kusi ong·aniko parakatenba, ia State University-ko 2011 bilsini Assembly-o niamko passed ka·aha aro niam gita rikna a·bachengaha. Ia State University-ara a·doktangni chatro chatrirangnasan namgni ong·aigija, Salgro Salaram a·cdokni dingtang dingtang college-rango poraie graduate ong·giparangba ia University-o admission-ko ra·e poraina man·gen. Central-ni dongimin niamko ja·riktelna nangani gimin, Chatro chatrirang Graduate ong·ani ja·mande, NEHU-o poraina gita Central University Entrence Test (CUET) porikkako sena nangani gimin neng·nikaniko man·a aro an·tangtangni namnikgipa department-ko poraina sikoba man·rongja, indiba ia State University-ode CUET porikkako sena nanggijan, chatrirang chatrirang admission-ko ra·na man·gen, ine Dr.Sangma parakataha.
A·doktango ia State University-ko man·baniara, a·doktangni chadamberangna nambegipa chol ong·chongmotgen. Ia University-o ge 23 dingtang dingtang college-rang affiliate ka·aha, uandake mikangchi ia University chu·sokgipa ong·gen ine sakkiko on·ani ong·enga ineba Dr. Sangma aganaha.
A·doko gital gital college-rangko bang·en kulienga, indiba ia University-o affiliate ka·kuja, uarangba ja·mano affiliate ka·na man·gen. Indiba ia university-ni ra·gatgimin niamrango pangchake kam ka·na nanggen, ine opposition dilgipa aganaha.
India a·songni Meghalaya a·dokna on·gimin niamo pangchake, a·doktango University-ko rikna Assembly-o pass ka·e a·doko skanggipa Captain Williamson Sangma State University-ko A·chik a·songo rikaha, A·chik a·songna namen kusini katta ong·aha. Da·ode, a·doktango State University dongahani gimin, chadamberang neng·nikani dongjawaha. Uni gimin ia University-ko mikkangchi name nirok simsakangna sakantian ku·monganiko on·an baksa gamchate ra·na nangchongmota. Mikkangchi A·chik a·songni chadamberang graduate ong·ani ja·man, chel·a biaprangchi re·ange poraina nanggijan nokrangtango ma·a paarang baksa donge poraina man·gnok aro ia University-o skigipani kamrangko ka·na gita cholko man·gnok ine Dr. Sangma aganaha.
