Williamnagar, Sept 7, 2024:East Garo Hills a·jani Dobu jolrango maming namroro silroroanirangko man·jaengani gimin, A·chik Holistic Awakening Movement (AHAM) Dobu Regional Unit, Dobu jolrango namroro silroroanirangko ra·bachina, a·dokni Skotong Minister Conrad K.Sangma-na PHE Minister Marcuise N.Marak-ni jak gita lekka sedoataha.
AHAM Dobu Regional Unit, Dobu PHC-ko CHC-ona ra·doate on·china dabiatenba, Dobu PHC-o song dam 45-na baten manderang sanna bananirangko ra·tokenga aro ian East Garo Hills-o gitchambatsranggipa PHC ong·ani gimin, Dobu PHC-ko ta·rake, CHC-ona ra·doate on·na man·genchimode, songni manderangna bang·a namgni ong·genchim, ine AHAM Dobu Regional Unit-ni General Secretary Windam G.Momin parakataha.
Unbaksana, Dobu jolo donggipa Veterinary Office-ni gimin janapatengon, ia office nokko galchipe donengani a·sel, songni manderang maming namgniko man·jaenga. Uni gimin, ia office-ko ta·raken chalaipilchina AHAM Dobu Regional Unit, Skotong Minister-ko didiataha.
Uandake, Dobu OGC-ni ning·o song dam 45-na baten man·ahani gimin, manderangna naljokaniko on·anio neng·nikaniko man·enga aro ia OGC-ko pulis station-ona ra·doate on·genchimode, bang·a songni manderangna chel·chakaniko on·na man·genchim, ineba AHAM-ni dilgiparang janapataha.
Indake ong·engon, Dobu-o SBI branch-ko kulichina, Dobu bajar kal·chakramko Mini Stadium tarichina aro Dobu Rimding-oni Bolmoram songona PMGSY ramako tarie on·china, AHAM Dobu Regional Unit, Skotong Minister-ko didiataha.
