Tura, Oct 3, 2024:Adita salrangna skang West Garo Hills a·jani DC Jagdish Chelani B-Mahal jolni a·arangko tona ge·etani ba order on·aniko Tura-ni MDC Bernard N.Marak raken jegalataha.

Marak-ni parakatani gitade, DC, District Council-ni ba Tribal-rangni a·ako tona gita order on·na man·ja. Maina iade sorkarini a·a ong·ja, District Council-ni ning·o donggipa A·chik jatni a·arangsa ong·a. GHADC-ni MDC-rang darangba ia a·arangko mai dakna am·enga u·irikja, indiba DC-ni a·a tona order on·ani ja·man, anga sandie iarangko ma·sina ba nikna man·aha.

Re·anggipa 2022 bilsion, Skotong Minister Tura Circuit House-o meeting ka·dile, ia a·arangni bidingo agangrikaha.
Ua meeting-o Council-ko chalaienggipa NPP-ni MDC-rang Albinush R.Marak, Rakesh Sangma aro a·dok sorkarini IAS officer Vijay Kumar aro gipin official-rang dongpaha. Indake meeting-o B-Mahal-ni a·arangko ra·na gita tik ka·e, MPDC aro MIDC corporation-rangni gita project-rangko dakna ia a·arangko District Council a·dok sorkarina pakwate on·na gita golpo ka·grikaha aro damrangkoba tik ka·grikaha ine Marak ma·sina gita man·aha.

Indake district council aro a·dok sorkarini tik ka·grikaniko darangba ma·sijachim, indiba jensalo DC-ni a·a tona order on·ani ja·mansa ma·sina man·aha. Ia a·arangko ra·ani ja·mano DC a·arangko tona order on·aha aro ua a8ako toanio District Council-de re·chapnasa nangaijok, iade niam ong·ja ine Tura-ni MDC jegalataha.

Ua a·arang District Council-ni ong·ja aro pale cha·naba man·ja. Sawa district council-ko a·a pale cha·na skia ine Marak sing·doatenba, district council-de a·a pale cha·na man·ja. District Council-de, ge·sa a·a-chiko nirokna Constitutionally songgipa Institution-sa ong·a. District Council-de a·ani nokgipa ong·ja. Ua a·arangde tribalrangnisa. Sixth Schedule-ni ning·o tribal-rangni a·arangko nirokna District Council-ko rikaha ba songaha ine Marak parakataha.

Da·alo Council-ara maidake, ua a·arangko gipinrangna on·e galna ba pale cha·na man·a? Maidakgipa constitutional provision-o iakora dakenga ine Tura-ni sing·doatenba, “An·chingde an·tangtangni a·akon sorkarina on·e galode, an·chingni atchu-ambirangni a·ana dakgrike sichakani, a·arangna salaani, janggi gale an·chingna Sixth Schedule-ko man·e on·aha. Ia man·e on·gimin Sixth Schedule-ko Institution-an a·arangko da·alo gipinna on·e galpilgenchimode, an·chingni atchu-ambirang aro ma·a paarangni an·chingna sichakani indin ong·gramaijok. Da·alo iako an·ching A·chik jat gimikan jegalna nanggen. Sorkarina a·ako palna man·jawa, jegitaba an·ching kangal ong·bo, jegitaba cholijabo an·tangtangni a·a-chi, ian an·chingni mikkim rasong aro an·chingni identity ong·a. An·chingko a·a dongjaode, an·chingni a·ani kosako bilrang dongjaode, an·chingni identity gimagnok!. Da·alo ia identity-ko gimaatna sikama na·song? Da·alo Phulbari gita dal·gipa dollongko taribaenga, iaba chingni Agreement-ni gita man·baenga” ine Bernard Marak janapataha.

Da·alo ia dollong sokbaengani gimin, B-Mahal-ni a·a hectare 5000-ko satellite-chi ba drone-chi toe sorkarina pakwatna siengjok. Indita hectare 5000 a·arango dongenggipa manderang bachi brangbo, bachi re·angbo aro maiko dakbo? Da·alo A·chik a·songna chakatgipa NGO-rang ia kamko jegalna nanggen, an·chingni a·ako inch-saba gipinna on·na man·ja aro a·dok sorkaride tribal ong·ja, rorisa, a·dok sorkari an·chingni a·ako sekna man·ja aro an·chingni a·arango napdrana man·ja. An·chingni District Council Tribal Institution ong·a, an·ching jatni niam-reti, an·chingni right ba bilko ripingna nanggipa district council ong·a. Uni gimin district council-ko chalaienggipa EC-rang District Council-ni nitoaniko aro bilakaniko ong·siatna nangja ine Marak didiataha.