Tura, May 27, 2025: West Garo Hills a·jani Dalu block-ni ning·o ga·akgipa Gangbanga Tengpara songo nokdang ge·sako chong·motan Ma Kristina Marak-ni nokko May 25 tarik Robibar pring seng·nachibara, 3 bajimango mang 75 mongma jinma re·bae, nosto ka·e donangaha ine koborna u·iataha.

Ua a·sel ong·aniko nina gita GSU aro ADE, Dalu Unit-ni dilgiparang, Wildlife Department-ni manderang baksa ua biapona re·angaha.

Kobor-na u·iatani gitade, ua a·sel ong·anio rasong gnangbee nokni manderang darangba maming a·sel ong·a gri jokaha. Ma Kristina Marak-ni nokko ian bongagipa changna mongmarangni nosto ka·ani ong·engahachim. Pangnan bilsio changprak uamangni nokona mongmarang re·bae nok jamko aro bari baganrangko nosto ka·rongachim. Batanggipa somoirangonin indakgipa a·selrang ong·engoba, da·alona kingking, sorkarioni maming dakachakanirangko changsaba man·a dongkuja ine Kristina Marak aganaha.

Indake a·selo ga·akgipa nokni manderangko grongna aro a·selrangko sandie nina gita wildlife Department-ni manderang re·angaha. Ua a·sel ong·gipa songona GSU Dalu Unit-ni Assistant General Secretary Cherikkam R. Marak aro ADE-ni President Bacheng N. Sangma, uamangba re·ange nieaha.

Kristina Marak-ni nokdang iandakgipa a·selrangko chagronga chang-5 gapengaha, indiba sorkarioniko maming dakchakanirangko changsaba man·kujachim. Uni gimin ia a·selo ga·akgipa nokdangni manderangna joltangni MLA, MDC, wildlife department-ni manderang aro a·dok sorkari man·a dipet ta·raken dakchakanirangko on·atna nangchongmota ine dolgni NGO-rang daito gnanggiparangko didiataha.