Dadenggre, May 22, 2025: West Garo Hills a·jao donggipa Dadenggre Puri Govt. Higher Secondary Skulo minggitam kamrangko ta·rake chu·sokatchina Garo Students’ Union (GSU) Western Zone (North) Dadenggre, Skul Education aro Literacy-ni Director-na West Garo Hills a·jani DC-ni jak gita chitti sedoataha.

GSU Dadenggre-ni President Tengsan M Marak-ni sedoatgipa chittio mongsonggipa minggitam kamrangni bidingo janape seataha.

Dadenggre Puri Govt. Higher Secondary Skulo class XI-na Morning Shift-ko kuligenchimoba, da·onan skigiparangko kamo rakujaenga aro Basketball Court tarigipakoba matchotgija donchipenga, unbaksana gital rikdapenggipa skul building-koba matchotgija galchipe donenga ine parakataha.

Puri Govt. Hr. Secondary Skulo bilsiantian poraienggipa bi·sarang bariroroenga, indiba room-rang chu·ongja aro morning shift-ode skigiparangba dongkujaenga. Uni gimin ta·raken kragipa skigiparangko niam gita kamo rimnapchina GSU didiataha.

Unbaksana, galchipe donenggipa Basketball Court-ko ta·rake matchotchina didiatenba, skie ra·enggipa bi·sarangni ranta ka·aniko nikchangala gita ong·enga ineba parakataha.

Dadenggre Puri Govt. Higher Secondary Skulna 2021 bilsion tangka paisarangko on·ate, gital building rikenggipako da·onaba matchotgija galchipe donenga. Ia bilsio bang·a chatro chatrirangan matric pass ka·e, chubata gadango poraidapangna gita bang·bate admission-ko ka·tokenga, indiba class room-rang chakpiljaengani gimin man·a dipet ta·rake Skul building-ko matchote on·china, GSU department-ko, mol·molataha.