Resubelpara, Nov 23, 2024: North Garo Hills a·jani Assam sima ario donggipa Chorebolbok songo job card-ni kamrangko ka·a tik ong·jani gimin, Chorebolbok Village Organisation (VO)-ni dilgiparang November 20 tariko songbad-na seatgipa kattarang kakket ong·ja, tol·e matnanganisan ong·aia ine parakatenba, da·odipet Chorebolbok songni manderang pilakan apsan ku·mong nangrime, job card-ko ka·e cha·enga aro hajirangkoba tik ong·en man·tokenga ine songni Sordar Lakton Momin aro VEC Secretary Jewilson Sangma kobor ra·timgiparangna aganaha.
Chorebolbok songni manderang dolgni bak dake, job card-ni bidingo meligrikjae, kajia golmal ong·engani gimin, kobor ra·timgiparang, Bristibar salo Chorebolbok songona re·ange sing·sandianiko dakon, VEC Secretary, songni Sordar aro songni manderang, Silran Marak aro VO-ni dilgiparangsa tol·e songbad-rango seatha ine aganaha.
Indiba, VO dilgiparangni aganani gitade, re·anggipa November 1 tariko Chorebolbok songni manderang jinma meeting ka·e, Resu-Nokat ramako tarina jinma tik ka·e, jak songe ra·chakahachim.
Indiba, VEC-ni Secretary an·tang saksan gipin ramako tarina geotag ka·engaha, ine VEC-ni President, VO-ni dilgiparangna aganatahani gimin, VO-ni dilgiparang meeting ka·piltaichina aganataha, indiba Secretary meeting ka·taigija saksan srik srik, gipin ramako tarina geotag ka·aha ine aganaha.
Songni tik ka·e, ra·chakgimin ramako tarija gipin taramko tariani giminsa, “Chinga namnikja raken jegala aro block office-ni technical-na phone ka·e aganatahani gimin, technical-ba VEC Secretary-na call ka·atskaha. Uni bidingosa job card ka·miting somoio jinma kajia ong·aha. Indake kajia ong·miting somoiosa Sordar bachiniba re·bae, chingko dokaha. Salgimikan kam ka·gipa biapo Sordar dongja, kajia ong·osa bao bachini re·bae chingko dokeaha” ine VO-ni dilgiparang aganaha.
Sordarni aganani gitade, songni manderang nangni namchiktangko agane ra·bo, songni manderangko ong·gija agane kajia ka·enga inani gimin, “Beben anga namchiktangko dokmanaha. Angni namchikgipa, Tame Momin, ang abini dal·batgipa demechik ong·a aro uni segipa Silran Marak, angni boningtangan ong·a. Iarang songni dilgiparang aro songni manderangko namnikjae, rikki-rikkot dakam dakode kajia ka·enga. Skangode, Chorebolbok songo indake ong·jachim aro kajia golmalba dongjachim. Indiba jensalo Silran Marak, angni namchikgipako jik ra·e, Chorebolbok songona re·baha, ua songni manderangko namnikja, development-rangko champengenga. Uni jik ra·e ia songo donga bilsi 5 ba bilsi 6-san ong·kuenga” ine Sordar Lakton Momin aganaha.
“Angko Lakton Momin namchiktang ong·ani giminsa, jinmani mikkango doke sate krat cha·atna nangama?, bia namchiktangko skie ra·na sikode aro angni namgijako nikode, maina nokona re·bae angko skie ra·na man·ja. Angni segipa donga. Segipani kosako maina angko jak de·na nanga, angade indakgipa bewalko namnikja. Namchiktangko skie ra·ora jinmani mikkango dokesa skina man·ama, uni kamko anga raken jegala. Bia angkosan dokja, angni ripengkoba doka” ine Tame Momin kobor ra·timgiparangna aganaha.
