Chokpot, May 31,2025: South Garo Hills a·jani Chokpot Rangso Upper Primary Skulo skigiparang rama namgijako a·dubekrara dake naptomgipa, chirang sikonge, ring chona nampilgipa ramako salanti re·rurae neng·nikaniko man·enga. Darangba ia ramako tarie on·gipa dongjani gimin, uamang an·tangtangsa rongtalate aro taridape, Chokpot-oni Paromgre gita Karukol-ona dakanggipa ramako re·ruraenga, ine GSU Chokpot Regional Unit, parakataha.

GSU Chokpot Unit-ni General Secretary Spensar R.Sangma-ni parakatani gitade, Chokpot-oni Karukol-ona dakanggipa ia ramako tarina gita ta·raken kamrangko a·bachengatchina a·dok sorkari gong kror 151 tangkarangko chamataha. Indiba da·ona kingkingba tarie on·kujaenga, ia ramaan a·bri jolo songdongenggipa manderangna aro gimiknan re·a doanio nangchongmotgipa aro mongsonggipa ong·a.

“Chinga ia ramako tarie on·china a·dokni Skotong Minister, Chokpot-ni MLA Sengchim N.Sangma aro PWD-ni Minister-ko ru·uate donchagija ta·rake ia ramako tarie on·china didiatenga. Jedakode skigiparangna namen dakchakbeani ong·gen aro jolni manderangnaba namgipa chol ong·gen” ine Sangma agandapataha.