Chokpot, May 3,2025: South Garo Hills a·jani Chokpot Civil Sub Division-ni ning·o donggipa Chokpot jolni manderang Chokpot Greater Water Supply Scheme-ni gita, Jal Jeevan Mission (JJM)-ni chiko nokantina sokate ba sale on·ani kamrangko chu·sokate on·na man·kujaengani gimin, Chokpot jolo songdongenggipa manderang ringani china namen neng·nikaniko man·enga ine GSU Chokpot Regional Unit-ni President Jist A.Sangma u·iataha.
Ma·mong sorkarini songadam nokadamrango songdongenggipa manderangna noksakoba watchanggija chi pipe-rangko sale on·china ra·gatgipa, JJM Scheme-ni chiko Chokpot jolni manderangna sokate ba chi jokate on·na man·kujaengani gimin, JJM-ni pipe-rangko ta·rake sokate on·china, PHE Sub Division-ni SDO, Junior Engineer aro Contractor-ko GSU Chokpot Regional didiataha.
GSU Chokpot Regional Unit-ni dilgiparang china neng·nikaniko man·enggipa Chokpot jolni manderangna ta·rake JJM-ni kamrangko chu·sokate on·china didiatahani gimin, PHE Sub Division-ni Officer-rang baksa Contractor, Sukrobar salo JJM-ni pipe line-rangko nirokangenba, man·adipet ta·rake kamrangko matchotatna jotton ka·gen ine ku·rachakangaha.
