Tura, Oct 14,2024:Re·anggipa October 4 tariko mikkarang dondikgija waanichi Garo Hills gimikon a·arang be·anio aro chirang bananio nok-jam, bagan bari, a·pal aro ma·manti bosturang nosto ka·ako man·gipa bang·a nokdangrangan sorkarini on·enggipa tangka paisarangko man·tokkujaenga ine Tura-ni MDC aro BJP-ni State Vice President Bernard N Marak matnangataha.

Garo Hills-o bang·a nokdangrangan PMAY nokrangko aro Ration Card-rangko man·tokkujaengani gimin manderangna namen jarengani ong·enga ine Marak parakataha.

Ma·mong sorkarini Beneficiary-rangna on·enggipa namgniko manderangni Account-rango sorkari, Aadhar gita tangka paisarangko gamna gisik nangjaenga aro chi bananichi nangchakeaniko man·gipa bang·a nokdangrangnan tangka paisa dakchakanirang sokjaenga. Mitam official-rangni on·gipa form-rango Aadhar aro Bank account-rangko gapatna maming cholrang dongjani a·sel bang·a nokdangrangan ia namgnirangko man·jaenga.

Uni giminsa official-rangni kamko altubatatna gita nangchakea man·gipa nokdangrangni bidingo chu·gimikko ma·sina man·na gita dingtangmancha cholko ra·gataha aro iano nangchakeako man·gipa songni manderang gapattokenga, ine Tura MDC talatenba, manderangni gapatgipa lekkarangko bakan Skotong Minister-na on·atgen ine parakataha.

Sorkarini on·enggipa namgnirangko pilak manderangan man·china gita manderangni gapatgipa form-rangko ma·mong sorkarini official-rangnaba on·atgen ineba Marak parakataha.

“Prime Minister’s Relief Fund-ni ning·o on·enggipa tangka paisa dakchakaniko man·na manderang nangachim, indiba Meghalaya a·dokode manderang iani maming namgnirangko man·jaenga. Disaster Management Department-ba chingni RTI-na maming talatanirangko on·na man·jaha. Bolni dollongrangko RCC dollong rikna nangachim, indiba RCC dollongrangko rikjahani a·sel chi banani somoio bang·a dollongrangkon chi pe·angtokaha. Ian ANVC dolni songgigrikaniko pe·ani gitaba ong·aha. Bang·a songrangon nosto ong·ako man·gipa PMGSY rama aro dollongrangko ta·raken taripilna nangenga,” ine Marak parakataha.

Chi bananichi neng·nikanirangko man·enggipa manderangna BJP sorkarisa tangka paisarangko on·atenga. Batanggipa somoirango South Garo Hills aro gipin a·jarango chi bananichi neng·nikanirangko man·enggipa manderang maini a·sel tangka paisani gita dakchakanirangko man·jaha ineba BJP-ni State Vice President, a·dokni Skotong Minister Conrad K Sangma-ko sing·doataha.

Garo Hills-o NPP-ni manderangna tin ba CGI sheet bundle gni ka·e sualaniko dontongchina BJP dilgipa, a·dokni Skotong Minister aro NPP-ni National President Conrad Sangma-ko didiataha