Tura, Feb 18,2025: Ma·mong sorkari scholarship-ni tangkarangko watatkujaengani gimin chatro chatrirangni man·na nangenggipa, scholarship-rangko man·tokkujaenga ine Skotong Minister Conrad K Sangma-ni agananiko Tura-ni MDC aro BJP-ni State Vice President Bernard N Marak Sombar salo jegalatenba, a·dok sorkarian man·na nanggipa bimingrangko aro 10% tangkarangko somoi gita on·atjaengani a·sel chatro chatrirang scholarship-ko man·tokjaenga ine parakatskaaha.

Adita salrangna skang a·dokni Skotong Minister Conrad K Sangma, chatro chatrirang scholarship-rangko man·tokjaengani gimin an·tangan suk ong·gijaniko parakatenba, scholarship-ni tangkarangko ma·mong sorkarionisa, chatro chatrirangni account-ona watatronga ine talatahachim.

“Budepa butchumarangni Pension, Muster Roll aro dingtang dingtang man·gnirangko a·dok sorkari, ma·mong sorkarini watatjaoba tangka paisarangko on·sona man·aiachim, indiba scholarship-rangko on·anide ma·mong sorkarionisa chatro chatrirangni account-ona chipatengani gimin a·dok sorkari mamingkoba dakna man·ja. A·dok sorkari scholarship-ni tangka paisarangko on·sogenchimoba, ja·mano ma·mong sorkarioni watatahaode, ua tangka paisarangko man·pilani dongjaha ine Skotong Minister, Social Media-o parakataha.

Skotong Minister-ni iandakgipa kattarangko talatanina aganchakatskaengon, scholarship-ni tangka paisarangko man·kujaengani gimin iandakgipa kattarangara kakket ong·ja, indiba a·dok sorkarisa somoi gita kamrangko matchotatjaenga ine Sombar salo, Tura-ni BJP MDC Bernard Marak matnangatskaha.

Scholarship-ko man·na nangenggipa chatro chatrirangni bimingrangko aro a·dok sorkarini 10% percent on·na nangenggipa tangkarangko watatkuja dipetde, ma·mong sorkari, scholarship-ni tangkarangko chatro chatrirangni account-ona chipatjawa. A·dok sorkarini 10% percent baksa ma·mong sorkarini 90% percent-ko chandimosa 100% percent tangkarang ong·gen. Uni gimin sing·na nanganide, scholarship man·na nangenggipa chatro chatrirangni bimingrangko a·dok sorkari somoi gita watatengama? A·dok sorkarini on·na nangenggipa 10% percent tangkarangko somoi gita watatengama? Ianosa neng·nikanide ong·enga. A·dok sorkarini 10% percent aro scholarship man·na nanggipa chatro chatrirangni bimingko somoi gita ma·mong sorkariona watatjaenga ine Marak parakataha.