Tura, Feb 24,2025:Tura-ni MDC aro BJP-ni State Vice President Bernard N.Marak chatro chatrirangni scholarship-rangko ta·rake on·china a·dok sorkariko didiataha.

Chatro chatrirangni scholarship-rangko a·dok sorkarini on·ninggija donganiara Scheduled Tribe (ST) chatro chatrirangni man·gni bilrangko jegalani ong·a ine Marak parakataha.

Bernard Marak-ni parakatani gitade, scholarship-rangko on·ningjaengani gimin, Tribal Ministry-oniko am·sandiaton, a·dok sorkarini watatgipa chatro chatrirangna somoi gita tangka paisarangko watatengachim ine Tribal Ministry-oni u·iatskaha.

A·dok sorkarioni 10% percent-ko on·atjaode, ma·mong sorkari 90% percent-ko on·atna man·jawa, ine Marak parakataha.

Scholarship man·na nangenggipa chatro chatrirangni bimingrangko aro 10% percent-ko a·dok sorkari watatningjaengani a·selsa jajaani aro chatro chatrirangna scholarship-rangko on·ani ja·manchakenga, ineba Tura MDC parakataha.

Jaantian chatro chatrirangni mobile recharge-rangoniko a·dok sorkari 4% Cess tax-ko kattienga aro chatro chatri sakprakan, japrako komibeoba gong 300-ni mobile recharge-ko ka·engani gimin ian krorni kror ong·pilengachim, indide maikai a·dok sorkari, 10% percent-ko on·na man·jaenga. Ian dal·begipa sing·ani ong·enga, ine Marak parakataha.

Chatro chatrirang bang·batan kangal cholgri nokdangrangonisa ong·ani gimin ST chatro chatrirangni neng·nikanirangko niatchina a·dokni Skotong Minister aro Education Minister-ko mol·molatenba, lekka poranian mongsonggipa daito ong·a, ine election-o ku·rachakgimin kattarang kakket ong·bebegenchimode, chatro chatrirangni neng·nikanirangko ta·raken niatna nangchongmota, ine Tura MDC parakataha.