Tura, Nov. 8, 2024: Chang 48-gipa 100 Drums Wangala Festival ba Dama Bol 100-ko Doke Wangalaniko Chibragre Wangala A·dam-o Bristibar saloni a·bachengataha aro Wangalaniko November 7 tarik Bristibar saloni 9 tarik Sonibar salona salgittam joljol ong·atenggen.
Ia Wangalaniko ong·atanio dingtangmancha, A·chik jatni kal·susaanirang, Handloom aro Handicrafts Exhibition-ko do·ga oprake on·angjolaha.
Ia Dama Bol 100-ko Doke Wangalaniko West Garo Hills a·jani Deputy Commissioner Jagdish Chelani, a·bachengate on·angagaha aro ia Wangalani bak gita Wangala A·damo rikgipa Nokpante aro Nokmong ba Nok A·chikko nokdonggae on·angjolaha.
Uandake, DC Handloom aro Handicrafts Exhibition-koba do·ga oe on·angaha aro iano Harding Theological College-ni Principal Dr. Imnanungshi Imsong, GHADC-ni Deputy CEM Nikman Ch Marak, GHADC-ni Joint Secretary Peterr R Marak, Hundred Drums Wangala Festival Committee (HDWFC)-ni Chairman Ronald Rikman Ch Sangma aro gipin dilgiparang dongpae bakko ra·angtokaha.
Ia Dama Bol 100-ko Doke Drums Wangalniko a·bachengatani salo, West Garo Hills a·jani Deputy Commissioner, ia Wangalaniko nambee ong·atna man·ahani gimin, Hundred Drums Wangala Festival Committee-ni dilgiparangko mittele, ia Wangalaniara Garo Heritage Village-nasan ong·aigija, A·chik jat gimiknin mongsonggipa maniani ong·a ine aganangaha.
Ia A·chik jatni Wangalanio bang·en daka rikanirang gnang aro ia jattangni daka rikanirangko a·gilsakna mesokan baksa tang·dodapatchina aro dingtang dingtang biapni manderangko Garo Hills-ona okamchina DC, A·chik sakantikon didiangaha.
A·chikrang bilsi gimiko game ge·e man·gipa mi misi aro dingtang dingtang a·bani bosturangko “Pattigipa Ra·rongipa Misi Saljong”-ko mittelpilskae bilsiantian A·chikrang Wangalaniko dakronga aro uandaken ia Dama Bol 100-ko Doke Wangalaniko 1976 bilsio Asananggre kal·chakram biapo a·bachengataha.
Indake ia chang 48-gipa Dama Bol 100-ko doke Wangalani skanggipa salo A·chik jatni kal·susaanirang jekai Jakpong Pe·a, Rong·ma Chilsusaa, Rong·ma Gosusaa, Wa·pong Sika, An·ding Okaniko ong·atangaha.
Ua agreba Wangalani skanggipa salo, NEHU Tura Campus-ni OPATA aro ASA dolrang dingtangmancha Wangale mesokangaha.
Indake ia Wangalaniko ong·atani bak gita A·chikrangni bijak song·susaani aro budu salgrikanikoba ong·atangjolaha. Budu salgrikanio Rongkhon dol chegipa ong·aha aro All Garo Hills MeECL dol gnigipa biapko man·angskaaha.
